Pari namunal gipapriso

CEBU, Philippines — Nagtingkagol karon sa prisohan ang kura paruko sa Nativity of Mary Parish sa Canduman Dakbayan sa Mandaue human kini gireklamong nanagmal sa usa ka 15-anyos nga dalagitang PWD (person with disability) Miyerkules sa gabii.

Ang pari nga gireklamo mao si Fr. Decoroso Olmilla, 61, padre kura sa maong simbahan sud na sa unom ka tuig.

Matud pa ni Police Officer 1 Jinelyn Formentera, hepe sa Women and Children Protection Desk sa Canduman Police Station anak kini sa kusinera sa pari ang biktima.

Sumala pa sa pasangil, nasuko ang pari ngadto sa dalagita kay napasagdaan niini ang iro ug wala naatiman kay nilaag kini sa balay sa ilang silingan. Sumala pang Formentera nabunalan sa maong pari og karton ang dalagita.

Ang dalagita nagpatabang sa ilang silingan kinsa mitawag usab og polis hinungdan nga gidakop si Fr. Olmilla diha sa kumbento. Wala hinuon mopakita og pagsupak ang pari ug mikuyog kini sa kapulisan.

Gitug-an ni Formentera, base sa pangangkon sa bata dili lang kini ang unang higayon nga nadapatan kini sa pari ilabi na kung dili niya masunod ang sugo niini kaniya.

Ang biktima ug ang inahan niini desididong mopasaka og kasong kalapasan sa RA 7610 batok sa pari.

Ang pari nagdumili sa paghatag og pamahayag sa dihang gikuhaan unta sa Banat News og pamahayag. Matud niya ang iyaha lang abogado ang motubag sa mga pangutana.

Giandam na sa kapulisan ang kasong ipasaka batok sa maong pari. Daghan sa mga parokyano sa pari ang nibisita kaniya sa prisohan ug dili makatuo nga nahimo kini ni Olmilla kay buotan ug mahigugmaon kini sa mga bata.

Samtang ang tigpamaba sa Archdiocese of Cebu Msgr. Joseph Tan, nitug-an nga magpaabot sila sa pormal nga reklamo batok sa pari ug dili sila mobabag may kalabutan niini tungod kay andam sila motahod sa lagda sa balaud ug korte na ang mosulbad sa sitwasyon.

Dugang pa ni Tan, motabang sila sa legal battle dili aron tabunan ang nabuhat niini kondili aron mogawas ang kamatuoran kay kinahanglang adunay hustisya.

Sa pikas bahin, mipadayag og kaandam ang Provincial Women’s Commission (PWC)  pagtabang sa reklamante matud ni Bise Gobernador Agnes Magpale, chairman sa PWC.

“That’s really violence against women and children no matter unsay sala sa bata. The best interest of the child man gyud ang atong gisunod,” dugang sa bise gobernador. (Le Phyllis F. Antojado/IBM)(BANATNEWS)