Palma nakig-uban sa mga priso

CEBU, Philippines — Gihangop ug gikalipay sa mga inmates sa Cebu City Jail ang pagpahigayon og misa ni Cebu Archbishop Jose Palma uban nila Fr. Roberto Ebisa ug duha ka mga deacon. Si Palma sa iyang wali mitug-an nga taliwala sa mga problema ug hagit sa kinabuhi si Hesus anaa kanunay ug andam motabang. Ug ang santos nga misa nga iyang giselebrar importante kaayo kay nagpahinumdum kini nga kinahanglan mag-ampo kay anaa ang Dios sa taliwala. Malaumon ang arsobispo nga dili kadto ang katapusan niya nga misa sa Cebu City Jail kay makig-alayon siya sa CAPA alang sa ipahigayon unya nga mga kalihukan.

Kagahapon mao ang ikaduha nga misa ni Palma sa prisohan diin ang katapusan nahitabo niadtong tuig 2014.

Si Fe Barino ang pangulo sa Commission on the Laity ug Surrender to God program miingon nga naningkamot sila sa pagtabang sa mga inmates kay aduna pa silay paglaum.  Gibutyag ni Barino, nga ang pagbisita ni Palma sa prisohan nagpamatuod nga pinangga sa Ginoo ang mga inmates.

Si Jail Supt . Renante Rubio, mitug-an nga ang pagbisita sa arsobispo susama na og nakumpleto na nila ang ilang Misa de Gallo ug panghinaut niya nga dalhon sa mga priso ang ilang kabag-ohan hangtod sa ilang pagbalik unya sa ilang pamilya. (Rowena D. Capistrano/DILT)

Libreng sakay gihangop

Gihangop sa mga sumasakay sa amihanang bahin sa Sugbo ang gitanyag nga libreng sakay sa Department of Transportation nga gisugdan niadtong Disyembre 20 hangtod sa 24. Si Land Transportation Office (LTO)-7 director Victor Caindec miingon nga kabahin ang maong programa sa ilang Oplan Ligtas Biyahe-Libreng Sakay Pamasko 2018.  Ang sales representative nga si Franz Labia, 34-anyos nga taga Brgy. Yati, Consolacion, Cebu mahinangpon sa maong programa ilabi na nga maglisod siyag sakay karong mga panahona diin mag-inilugay og PUJ ang mga pasahero aron makauli sa ilang panimalay.

Gumikan sa maong programa, alang ni Labia nga daku kaayo kinig ikatabang kay mabahin na man ang mga pasahero.  Sa nasayran ang  maong libreng sakay adunay napulo ka mga bus nga nagbiyahe sa amihanang bahin sa Sugbo ug laing napulo usab ang nagbiyahe sa habagatan.

Alang sa amihanang bahin, magsugod og pasakay og mga pasahero gikan sa Plaza Independencia, ikaduha sa SM City Cebu, San Miguel sa Tipolo, Mandaue, dayon sa Archdiocesan Shrine of  Our  Lady of Fatima sa Basak, Mandaue ug kutob ra kini sa SM City Consolacion.  (/DILT)(BANATNEWS)