Manindahay sa Tabunok gihatagan og konsiderasyon

CEBU, Philippines – Mga ambulant vendor diha sa Barangay Tabunok, Dakbayan sa Talisay ang gitugotan ni Mayor Eduardo Gullas nga temporaryong maka-display sa ilang mga baligya diha daplin sa karsada niining nagsingabot ang pasko ug bag-ong tuig.

Sayo pa, ang grupo ni Edwin Nierves, pangulo sa task force nipatuman sa paghawan sa mga nakababag sa agianan sa mga tawo.

Matud ni Nierves nga nakatampo sa kahuot sa sakyanan ang mga ambulant vendors tungod kay ang mga tawo anha na moagi sa karsada dili na sa sidewalk ug nakabalda kini sa dagan sa trapiko.

Si Alan Maunda, usa sa mga vendor nga Muslim nga nagpuyo na sa Dakbayan sa Talisay nitataw nga nihangyo sila sa mayor isip mao na lang ilang pinaskohan nga makabaligya pa sila karon hangtud sa Disyembre 31 alang sa ilang panginabuhi.

Moabot ngadto sa 30 ka manindahay ang nihangyo kang Gullas diha sulod sa iyang buhatan.

Si Gullas sa iyang bahin, nagkanayon nga nakasabot siya sa mga manindahay ug angayan usab nga paminawon ang ilang hangyo.

Samtang si Nierves nagkanayon nga wala siya’y problema sa desisyon sa mayor tungod kay igo lang usab siyang nagtuman sa mga sugo kalabotan sa iyang trabaho.

Dugang ni Nierves nga inig mapupos na ang kasabutan unta mosabot usab ang mga manindahay kanila nga igo lang sila nga nituman sa ilang mga trabaho. (/ BDD)(BANAT NEWS)