CEBU, Philippines — Lima ka mga aplikante pagka polis alang sa tuig 2018, gipangtangtang human nadiskobrehang nalambigit sa ilegal nga drugas.
Si Police Regional Office-7 director Police Chief Supt. Debold Sinas maoy mibutyag niini atol sa iyang year-end report.
Matud pa nga nakadawat sila og mga impormasyon nga nalambigit ang maong lima ka aplikante sa ilegal nga drugas.
Dihang gisubay sa mga kadagkuan sa kapolisan, nakumpirma nila ang maong pasangil.
Wala na hinuon gibutyag sa heneral ang mga pangalan sa maong mga Police Officer 1 applicants.
"They are involved in illegal drugs. Di na mi mo-divulge whether unsay involvement nila sa illegal drugs and sa kung kinsa man gani na sila," si Sinas nagkanayon.
Gumikan sa sayong pagsala sa maong mga aplikante, giingon nga hayan maibanan ang mga eskalawags nga polis.
Giangkon ni Sinas nga daku og natabang ang pagpa-print nila og mga dagkong tarpaulin sa mga dagway sa mga aplikante.
Gibalandra ang maong mga tarpaulin sa mga pampubliko nga lugar sama sa simbahan, barangay hall, mga police station, mga dagkong mall ug uban pang lugar nga dugukon sa mga tao.
Tumong sa maong tarpaulin nga makakuha og dugang impormasyon sa mga aplikante gikan sa publiko. Kini aron sab masayran sa publiko ang mga umaabot nga mga polis. (/DILT)(BANATNEWS)