Duha ka drug den gironda

CEBU, Philippines – Sobra 30 ka tawo ang nasikop sa mga sakop sa Philippine Drug Enforcement Unit 7 ug kapolisan atol sa ilang gipahigayong managlahing buy bust operations sa Dakbayan sa Sugbo ug sa Talisay City.

Sa unang operasyon gihimo kini sa Barangay Duljo Fatima nga niresulta sa pagkasikop nilang Marina Abes, Reylan Quizon, giingong nagpadagan sa maong drug den.

Nadakpan ang target nila nga si Adones Quizon, ug ang mga gidudahang mga kustomer nga silang Cedrick Salocana, Vincent Sanchez, Rainer Gochoco, Medcel Omega, Ryan Niño Suarez, John Rel Dinawanaw ug Justinian Asingua.

Matud pa ni PDEA Agent Jessie Cabutotan, team leader sa operasyon dul-an sa usa ka semana nilang gipanid-an ang lugar tungod sa mga report nga dunay drug den sa maong dapit.

Dili mominos sa 13 gramos ang ilang nasakmit nga ginadiling drugas nga mobalor og dul-an P89 mil base sa Dangerous Drug Board ug lakip ang kagamitan sa pagsuyop og shabu.

Ang ikaduhang operasyon gihimo diha sa Barangay  Tabunok sa Dakbayan sa Talisay ug nasikop si Jerome Relado nga giingong maoy nagpadagan sa drug den ug mao ilang target nga sikupon.

Apil sa gidakop ang mga tawo diha sa sud sa drug den nga sila si Jordan Relado, Pedro Paras Jr, Josephine Gabonaga, Albert Taba, Ignacio Gabardo, Hilario Gabardo ug John Laorence Cabiao.

Nasakmit gikan sa mga dinakpan ang kagamitan sa pagsuyop, drugas nga mobalor og dul-an sa P82 mil nga motimbang og 12 gramos. Cebu City

Sa linaing operasyon sa kapolisan sa Cebu City, walo ka tawo usab ang nadakpan gikan sa lain-laing barangay.

Nadakpan ang gitumbok nga tigpayuhot og ilegal nga drugas sa Barangay Luz nga si Ely Libaton alyas “Ely”, 50, nga nakuhaan og usa ka medium nga pakete, ug upat ka gagmay’ng pakete nga gituohang shabu.

Samtang sa Barangay Labangon, nadakpan sa mga sakop sa Police Station 10 si Roberto Luste Alcover, 29, nga nibaligya og drugas sa police decoy. Nakuha gikan kaniya ang unom ka gagmay, usa ka mediun nga paketeng gidudahang shabu.

Nadakpan usab ang usa ka senior citizen nga si Lolita Goyo Pepito, 68, ug si Jorey Trangia Casera, 35, diha sa Barangay Carreta human nakuhaan og pito ka gagmay’ng pakete ug 23 ka medium nga paketeng gidudahang shabu.

Ang duha nadakpan diha sa Sitio Laray sa maong barangay human nibaligya og shabu sa police decoy. Mokabat og 79 gramos ang nakuhang shabu gikan sa duha.

“Kanang tiguwang (Pepito) sugosugo-on pud na siya ni Raymond Dequito, nga taga Barangay Carreta ra pud na nadakpan sa una sa Station 2  sa hotel. Pag buy-bust namo didto naaktohan gyud ang duha ka subject ug napositibo nga adunay illegal nga drugas,” matud ni Chief Inspector Marco Maramag, hepe sa Station 10.

Sa laing operasyon, nadakpan sab silang Clinton Sanico Sabanal, 25, kinsa maoy target sa kapolisan diha sa Barangay Tisa. Ug giapil og sikop ang gidudahang tiggamitan og ilegal nga drugas nga silang Jonathan Villabar Lapasa, 24, ug Henry Martinez Caballero, 26,  ug Dave Jeremiah Balili Hera, 32.

Si Sabanal nakuhaan og  10 gramo nga gidudahang shabu. (Nichole Alexis A. Abas, USJR Intern/IBM)(BANAT NEWS)