Baybayon sa Santander gilimpyohan

CEBU, Philippines — Moabot 250 ka kilong mga basura ang nakuha sa kapolisan ug mga residente gikan sa ilawom sa dagat ug sa baybayon sa Lungsod sa Santander niadtong Sabado sa buntag.

Ang maong programa gitawag nga Clean up drive and Scubasurero diin gipangulohan sa hepe sa kapolisan sa Santander nga si Police Senior Inspector Margienette Yosores.

“Importante ni kay among gi-profile ang tourist spots. Di mi gusto nga mapareho mi sa Boracay nga nag-island closure gyud, ma-alkansi na ta ana so dapat di ta maghuwat nga maingon ana ta,” si Yosores nagkanayon.

Matud niya, bisan ang PNP adunay programa pagprotihir sa kalikopan nga gitawag og Oplan Kalikasan.

Nagsugod ang clean up drive ug scubasurero sa Barangay Poblacion hangtud didto sa Barangay Looc, Cabutungan ug Barangay Liloan sa maong lungsod.

Matud pa nga mas daghan sila karon og nakolektang basura kun itandi sa susamang operasyon niadtong Mayo niining tuiga nga 150 ka kilo lamang.

Gipasabot ni Yosores nga kadaghanan sa basura gikan sa ilawom sa dagat mga botelya ug mga ligid.

Mitabang sa maong operasyon ang 152 ka tawo nga gilangkoban sa mga barangay officials, drug surrenderees, nagkadaiyang scuba divers sa mga resorts, mga residente ug 11 ka polis.

Nanawagan si Yosores sa ubang mga lungsod nga buhaton usab kini sa ilang mga dapit ug giawhag ang publiko nga di magpataka og labay sa ilang basura. (/IBM)(BANATNEWS)