PHO nihimakak sa pasangil

CEBU, Philippines — Gihimakak sa Provincial Health Officer ang pasangil batok sa mga doktor sa Cebu Provincial Hospital-Danao kalabotan sa kamatayon sa usa ka bata tungod sa dengue niadtong Nobyembre 29.

Ang Provincial Health Office kasamtangan kini nihimo og imbestigasyon sa kamatayon ni James Francis Gulfan, 3-anyos nga giingong wala dayon atimana sa mga doktor ug nurse sa maong hospital. Matud ni Dr. Rene Catan, hepe sa PHO  nga ilahang mandato nga bisan kinsa nga pasyente ilaha gyud dawaton apan ang mga medical practitioner aduna kini gisunod nga protocol.

Si Arlene Manipis Reigo, iyaan sa bata sa iyang Facebook post nisaysay nga samtang didto sa CPH-Danao ang pamilya sa bata dala si Francis aron ipa-admit tungod kay niubos na ang platelet count niini apan ang doktor giingong nisulti nga walay bakante ang hospital. Si Catan nagpaabot karon sa written answer report gikan sa duha ka doktor sa maong tambalanan kalabot sa hitabo.

“Naghulat pa ko sa official response sa doctors, ganahan ko on record makadawat ko sa ilang tubag within 48 hours”, matud ni Catan kinsa una nang nisaad nga walay cover up nga mahitabo sa ilang gihimong imbestigasyon. - BDB (BANAT NEWS)