CEBU, Philippines – Moabot 80 ka mga paltik nga kalibre .38 nga rebolber ang napalgan nga gisulod og sako didto sa Sitio Campo 5, Barangay Campo 4, Dakbayan sa Talisay kagahapon sa buntag.
Si Chief Insp. Ardeolito Cabagnot, deputy chief sa Talisay City Police Station nibutyag nga adunay mga bata nga nakakita sa maong mga armas ug maoy nipahibawo sa barangay.
Ang maong mga armas nabulit na sa lapok ug gisulod sa sako. Gituohan ni Cabagnot nga gipanag-iya sa grupo sa mga kriminal nga nangahadlok na nga madakpan hinungdan nga gipanglubong ang ilang mga armas.
Wa sab isalikway nga posibleng gamiton kini panahon sa eleksyon lakip na ang posibilidad nga iya kini sa mga druglords o mga rebelde.
Dakong pasalamat ni Cabagnot nga nakuykuyan ang mga armas ug wala kini magamit sa dautang elemento. -/IBM (BANAT NEWS)