Dose ka Purok gipasidunggan sa RAFI

CEBU, Philippines — Gi-recognize sa Ramon Aboitiz Foundation Inc. (RAFI) pinaagi sa “Mega Cebu Purok Awards” ang mga top performing puroks isip mga maayong sulundon sa tanang purok a Metro Cebu local government units (LGUs).

Si Christian Anuta, ang señior program officer sa Governance and Linkages Unit sa RAFI, miingon nga ang maong programa mihatag og pasidungog sa mga most outstanding purok gikan sa dose ka LGUs nga sakop sa Metro Cebu.

Dugang ni Anuta nga ang mga purok nga gipasidunggan miagi og assessment process nga mao ang purok readiness measure. Siya midugang nga ang dose ka purok gipili sa LGU isip purok with distinction.

Si Kim Caballes, sa Purok V sa Danao City, usa sa mga midawat sa maong pasidungog miingon nga ang pagtinabangay ug panaghiusa sa mga tawo sa ilang lugar mao ang hinungdan nganong usa sila sa mga gihatagan og award.

Ang dose ka mga purok nga gipasidunggan mao ang Purok V sa Danao City, Purok Magtalisay sa Compostela, Purok Kalubihan sa Liloan, Purok Tambis sa Consolacion, Purok Saging-saging sa Mandaue, Purok Maalagaron sa Cordova, Purok Vischoa sa Talisay City, Purok 7 sa Minglanilla, Purok Aidtech 1 sa Siyudad sa Naga, Purok Sayaw sa San Fernando, ug Purok Pongtod sa Dakbayan sa Carcar. Tumong sa maong programa nga maila ang talagsaong katakus sa mga purok kabahin sa kaugmaran ug kaayohan sa ilang kumunidad nga makatampo sa Metro Cebu 2050 Vision. - Joevelon G. Pinay (BANAT NEWS)