CEBU, Philippines — Hiposon sa kapolisan sa Dakbayan sa Mandaue ang mga menor de edad nga manaygon diha sa kadalanan sa siyudad paglikay sa aksidente.
Si Chief Inspector Mercy Villaro, public information officer (PIO) sa Mandaue City Police Office (MCPO) nagkanayon nga ilang higpit nga gidili ang pagpanaygon sa mga bata diha sa kadalanan niining panahon sa pagsaulog sa pasko.
Ang mga polis nga magpatrolya sa adlaw ug gabii maoy mohipos sa mga bata nga makit-an nga manaygon diha sa kadalanan ug dalhon kini diha sa ilang buhatan.
Ang mga ginikanan sa mga bata ilang ipatawag ug posibleng mapasakaan og kaso tungod sa pagpabaya nila sa ilang anak.
Nabantayan niining nagkaduol na ang pagsaulog sa Pasko adunay mga bata nga manaygon nga mosugat sa mga sakyanan diha sa highway Seno sa Barangay Guizo, Barangay Subangdaku ug sa national highway sa Barangay Basak.
Si Villaro niawhag sa mga ginikanan sa mga bata nga dili tugotan nga manaygon ang ilang anak tungod kay delikado kini sa disgrasya. (/BDB)(BANATNEWS)