CEBU, Philippines – Wala ra’y pagsupak sila si Konsehal Dave Tumulak ug Francisco Ouano nga apil na ang military sa pag-implementar sa traffic rules pinaagi sa Inter-Agency Council for Traffic (IACT).
Si Tumulak, Chairman sa Committee on Public Order and Safety miasoy tulo ka tuig ang nakalabay duna siya’y resolusyon nga nag-request sa Armed Forces of the Philippine (AFP) nga motabang pagbantay dili lang sa traffic apan lakip na sa pagpakgang sa kriminilidad.
Matud niya kinahanglan gyud og dugang magbalantay sa dagan sa trapiko karong mga panahona tungod sa naghinangat na ang Pasko ug selebrasyon sa Sinulog.
Giawhag sab niya ang publiko nga dili mahadlok nga makakita sa mga sundalo nga magdala og tag-as nga kalibre sa armas sanglit nasayod man ang kasundalohan sa ilang obligasyon.
“Mo-cooperate gyud, we are the same government office implementing the laws of the land and support the national government in terms of law enforcement, this is a matter of discipline. Well the public are encourage to take a picture or video if there is any violation committed para sad ma-aware ang public or to call the concern agency so pinaagi sa social media, pinaagi sa public malikayan gyud ang pagpangabuso,” asoy ni Tumulak. Samtang ang Operation’s Chief sa Cebu City Transportation Office (CCTO) Francisco Ouano miasoy bisan og wa pa’y militar gidasig na nila ang katawhan nga magtinabangay kay usa kini sa pamaagi aron madisiplina ilabi na karon nga daghang draybers ang mga abusado ug wala’y disiplina.
Sa pagkakaron ang CCTO dunay 400 ka traffic enforcers apan bisan pa og ihurot kini pag-deploy kun walay disiplina ang mga tawo wala gyu’y mahitabo.
Sa laing bahin, giawhag sa focal person on traffic management sa Probinsya sa Sugbo ang mga local government unit nga ipatuman gyud ang memorandum sa Department of Interior and Local Government (DILG) ngadto sa mga mayor nga bawalan na ang mga traysikol pagbiyahe sa mga national highways kay nagdala sila og traffic sa dalan.
Si Jonathan “Joy” Tumulak ang focal person on traffic management sa probinsya miingon nga suporta kini sa Kapitolyo ngadto sa LTFRB ug LTO ug uban pang ahensya sa pagpatuman sa IACT.
Matud ni Tumulak nga nagpasalamat si DOTr Secretary Manuel Gonzales ngadto sa probinsya sa pagpalabang og ordinansa nga makatabang pagsulbad sa problema sa trapiko. (Le Phyllis F. Antojado/IBM)(BANAT NEWS)