Mga ulo sa polis may patong?
CEBU, Philippines – Ulo sa mga matag operatiba sa kapolisan nga nakatutok sa kampanya kontra ilegal nga drugas giingong may patong nga P20 mil sumala pa sa hepe sa Cebu Provincial Police Office nga si Police Senior Supt. Manuel Javier Abrugena.
Matud pa ni Abrugena, nakadawat sila og impormasyon nga ila kini karong gi-validate kun unsa ka tinuod. Gihimong sanglitanan sa direktor ang nahitabo kang Police Officer 1 Jaylord Joseph Taping, usa sa mga operatiba sa Talisay City Police Station nga gipusil samtang kini nag-surveillance didto sa Sitio Mananga 2, Barangay Tabunok, Dakbayan sa Talisay.
Tulo ka mga gikatahapang mga durugista pinangulohan sa usa ka Rolando Valdez ug kaubang silang Arniel Hernane alyas Alvin ug usa ka Jospeh, alyas Dugyot ang kalit nga nipusil kang Taping ug sa mga kauban niini.
Si Taping kasamtangan pa karong nagpaalim sa tambalanan. Hinuon ang tulo ka mga suspek napatay gihapon sa mga polis sa pikas nga barangay diin sila nanago. Matud pa ni Abrugena gustong makabalos sa mga durugista tungod kay nagkagamay ang kalibotan nga ilang gilihokan ug naapektahan na ang ilang ilegal nga negosyo. “Nakikita nila na lalong naging intensify ang ating mga anti -illegal drug operations and greatly affected na po sila,” matud niini. Wala na mibutyag si Abrugena kun diin gikan ang impormasyon, apan pagtataw niya nga dili lang kini sa Dakbayan sa Talisay apan gikan sab sa ubang parte sa Probinsya sa Sugbo.
“Sa lahat po ng ating kapolisan sa Cebu Provincial Police Office sinabihan ko na po sila to take all the necessary precautions para di po maging target ‘yung ating mga kapolisan,” si Abrugena nagkanayon. - /IBM (BANAT NEWS)
- Latest
