Laing karsada sa South District gibuksan

CEBU, Philippines – Aron maluag-luagan ang kahuot sa trapiko sa Mambaling access road gihimong two way traffic sa Cebu City Transportation Office(CCTO) ang Southbound lane sa Vestil Street.

Sigon sa Operations Chief sa CCTO Francisco Ouano maagian na sa mga sakyanan padung sa habagatan ang pikas lane sa maong dalan aron makatabang sa kahuot sa trapiko sa dapit sukad niadtong miaging semana.

Ang kahuot sa trapiko sa lugar motumaw atol sa peak hours gikan sa alas- 6 hangtod na sa alas-10 sa buntag ug alas -4 sa hapon hangtod sa alas -9 sa gabii.

Ang padung sa habagatan mag-aginod gikan pa sa Natalio Bacalso Avenue duol sa  Cebu Institute Technology University hangtod na sa Cebu South Coastal Road (CSCR).

Ang problema mitumaw tungod sa padayong pagtukod sa underpass sa N. Bacalso Avenue eskina sa F. Llamas Street hinungdan nga ang mga sakyanan ilabi na ang mga pasaheroang bus padung sa habagatan anha na gipalusot sa CSCR. Sigon ni Ouano mahimo gihapon makaagi sa mga diversion roads sama sa Caimito Street, Ganciang, F. Llamas Street ug uban pa. -/IBM (BANAT NEWS)