CEBU, Philippines – Nabalik na sa normal ang mga biyahe sa barko kagahapon human gilibkas sa Philippine Coast Guard Cebu Central Visayas ang ilang pagsuspenso sa paglawig sa tanang mga barko ngadto sa mga silingang probinsiya sa Sugbo.
Matud ni Lieutenant Junior Grade Michael John Encina, tigpamaba sa PCG nga base sa ulahing weather forecast ug bulletin sa Philippine Atmospheric Geophysical and Astronomical Services Administration (PAGASA) ilaha nang gilibkas ang temporaryo nga suspension sa tanang mga barko nga mopadulong ngadto sa Western Cebu ug Eastern Negros sugod sa alas 3:00 sa hapon.
Sayo pa usab niini, gilibkas usab sa PCG ang ilang suspension sa mga biyahe padulong sa Bohol, Samar, Eastern Samar, Biliran, Leyte, Isla sa Camotes, Masbate, Surigao del Sur, Surigao del Norte, Camiguin, Dinagat Island ug uban pa.
Atol niining pagsulat gitug-an ni Encina nga ang biyahe padulong sa Northern Negros Occidental ug Western Visayas maoy padayon pa nilang gikanselar.
Mapasalamaton si Encina sa pagsabot sa katawhan tungod kay wala silay laing tumong ug tuyo sa pagkanselar sa mga biyahe alang kini sa kaayohan sa katawhan. -/BDB (BANAT NEWS)