Namalik na
CEBU, Philippines – Sa laing bahin, namalik na sa tagsa-tagsa ka pinuy-anan ang mga pamilya nga namakwit dihang nagdanga-danga ang bagyong Samuel.
Sa Dakbayan sa Sugbo, si Buhisan Barangay Kapitan Gremar Barete niingon nga niadtong Martes sa gabii niabot sa 71 ka pamilya ang boluntaryong nibakwit gikan sa Sitio Sandayong.
Sigun sa kapitan nga kagahapon sa buntag hinay-hinay na nga namalik sa ilang pinuy-anan ang mga nibakwit apan gitataw ni Barete nga gimanduan una niya ang iyang disaster team sa pagsusi sa dapit ug wala sila’y nakitang peligro.
Ang PDRRMO nakatala sab og 485 ka pamilya o 2,258 ka indibidwal gikan sa unom ka lungsod ug dakbayan ang namakwit apan nakabalik na sa ilang tagsa-tagsa ka panimalay kagahapon. Ang maong mga residente namuyo sa mga lugar nga delikado sa pagbaha ug pagdahili sa yuta ug ingon man ang anaa daplin sa baybayon o daplin sa sapa.
Ang nagkalain-laing lungsod ug siyudad sa Probinsiya sa Sugbo ang nihimo sab sa tagsa-tagsa ka pagpangandam dihang gikataho nga moagi ang bagyong Samuel sa ilang lugar. - Le Phyllis F. Antojado, Gabriel C. Bonjoc ug Romeo T. Limpangog/GMR (BANAT NEWS)
- Latest
