CEBU, Philippines — Tulo ka kawani sa Coca-Cola Bottling Company kinsa gidakop sa kapolisan sa Mandaue City Police Office (MCPO) ang mag-atubang og kaso tungod sa giingong pagpasiugda nila og picket nga walay permiso nga nagtugot kanila.
Si Senior Superintendent Julian Entoma, direktor sa MCPO nagkanayon nga ilegal ang gihimo sa maong mga kawani ug mag-atubang kini og kaso.
Matud ni Entoma nga ang mga kawani gihatagan og kahigayonan sa pagpadayon sa ilang gihimo ug giawhag sila sa kapolisan sa pagtangtang sa mga tulda nga ilang gimontar ug pabiyaon usab sila sa lugar apan giingong ang maong mga kawani nagdumili sa pagsanong sa maong awhag.
Gibutyag ni Entoma nga nipasaka sila og kaso ngadto sa piskaliya batok sa nahisgutang tulo ka kawani.
Giingong usa sa mga kalapasan sa mga kawani mao ang ilegal nga pag-picket tungod kay wala silay permiso ug sa giingong pagsupak nila sa awhag sa kapolisan.
Ang maong mga kawani nagpadayon sa ilang picket ug giingong nakahasol kini tungod kay nakaali man diha sa agianan sa nahisgutang establisamento ang ilang tulda.
Giingong ang maong tulo ka nagpasiugda sa picket mga sakop sa usa ka kahugpongan sa mga mamumuo nga ubos sa Alyansa sa mga Kontrakwal nga Mamumuo sa Sugbo. (BANAT NEWS)