CEBU, Philippines — Gibana-banang kapin sa 30 mil ka tawo ang nisaksi sa ika-18 ka tuig nga kasaulogan sa Garbo sa Lapu-Lapu Festival nga gipahigayon niadtong Domingo sa hapon.
Mga alas 3:00 sa hapon sa nahisgutang adlaw gipahigayon ang parada diin tungod niini nasinati ang kahuot sa mga sakyanan diha sa kadalanan sa Dakbayan sa Lapu-Lapu.
Ang nisalmot sa festival gibahin kini sa nagkadaiyang kategoriya nga naglakip sa higante category, float category ug Pasahalad.
Sa higante, ang Barangay Bankal nga nipasundayag sa aviation industries ang nakaangkon sa unang ganti nga P30 mil.
Gisundan sa Barangay Looc nga nipasundayag sa oil reservoir ug nadawat nila ang P25 mil nga premyo.
Ang Barangay Mactan maoy nakakuha sa P20 mil isip ikatulong ganti diin ang wood carving furniture maoy ilang gipasundayag.
Ug ang Barangay Pajac nga nipasundayag sa pagpamuhat og gitara ang nakakuha sa P15 mil isip ikaupat nga ganti.
Sa float category maoy nakadawat sa unang ganti nga P70,000 ang rope making sa Barangay Suba Basbas, P60,000 ang ikaduhang ganti nga pagpamuhat og puso sa Barangay Gun-ob, P50,000 ang ikatulong ganti nga aviation industries sa Barangay Bankal, P40, 000 ang ikaupat nga ganti nga shell craft industries sa Punta Engaño ug P30,000 ang ikalimang ganti sa Barangay Agus nga scuba diving, hotel and restaurant and beach resort.
Samtang sa Pasahalad maoy nakakuha sa unang ganti ang Barangay Gun-ob nga nagkantidad og P80 mil, gisundan sa Barangay Mactan nga adunay P70 mil nga ganti, ikatulo ang Olango group nga adunay P60 mil ang ganti, ikaupat ang Poblacion nga adunay P50 mil nga ganti, ikalima ang Barangay Looc nga nakadawat og P40 mil nga ganti. (BANAT NEWS)