Pagkasiak sa konseho sa Mandaue klaro na

CEBU, Philippines — Namatikdan karon sa mga Mandauehanon ang pagkasiak na sa mga sakop sa konseho sa Dakbayan sa Mandaue nga gipangulohan ni Bise Mayor Carlo Fortuna kinsa nisaway sa gipalabang nga ordinansahon nga giingong sayop ug out of order.

Si Konsehal Nenita Ceniza Layese kinsa sakop sa mayoriya ug oposisyon ang namahayag nga ang iyang giduso nga ordinansahon mao lang ang pag-usab sa mga komitiba nunot sa umaabot nga eleksiyon.

Giingong gideklarar ni Fortuna nga out or order ang resolusyon dihang giduso kini ngadto sa konseho.

Naglakip sa mga konsehal nga sakop sa mayoriya mao sila si Konsehal Layese, Carmelino Del Mar Jr., Ernie Manatad, Malcolm Sanchez, Dallie Mae Cabatingan, Marie Immaline Cortes-Zafra ug Cynthia Cinco-Remedio nga maoy nagpalabang sa maong resolusyon human sa pagdeklarar ni Fortuna nga out of order ug ni-walkout uban sa lima ka konsehal nga iyang kaalyado.

Gisalikway ni Layese ang panahom ni Fortuna nga sayop ang iyang gipalabang nga resolusyon sanglit ang konseho sa dakbayan dili mahimong mohimo og mga kausaban sa gihuptan nga komitiba gawas lang kun kini nahimo na nga bakante.

“Who decides? It must be voted by the sanggunian whether it’s wrong or not, tungod kay ang bise mayor igo lamang sa pag- presides ug dili ang pag-decide,” matud ni Layese.

Hinoon gitataw ni Fortuna nga ang bise mayor adunay gahum sa pag-rule ug pag-decide sa matag motion o resolusyon nga ipresentar sa hawanan sa konseho.

Sa nasayran nga nagsugod ang pagkasiak sa pagsinabtanay sa konseho sa Dakbayan sa Mandaue human sa ilang pag-file og Certificate of Candidacy COC ubos sa magkaatbang nga kandidato alang sa pagka-mayor nga sila si Mayor Gabriel Luis Quisumbing ug Kongresista Jonas Cortes. (BANAT NEWS)