Nanganak sa patrolcar

CEBU, Philippines — Gumikan sa grabeng traffic usa ka 32- anyos nga babayeng manganakay diha na nihimugso sa iyang anak sa sud sa patrolcar diha sa Barangay Basak sa Dakbayan sa Mandaue sa miaging Lunes sa udto.

Matud ni Police Officer 1 Elmer Gonzales sa Jagobiao Police Station 3 nga usa ka Lawrence Oliver Branzuela midangop sa ilahang estasyon pasado alas 11 sa buntag ug namasin na matabangan kini sila sa sitwayson sa iyahang igsuong babaye nga si Jackielyn Branzuela, 32, taga Barangay Labogon, Mandaue City,  kay nagbati na kini.

“Ang katong igsoon sa buntis, nihunong sa estasyon then nangayo og tabang regarding sa iyahang igsoon nga manganak,” matud ni Gonzales.

Ang taxi driver nga mohatud unta kanila wala na mosugot paghatud padung sa Our Lady of the Rule Maternity and General Hospital (mas naila kaniadto sa tawag nga Ouano Hospital) sa Dakbayan sa Lapu-Lapu kay nahadlok nga basin manganak ang babaye sa sulod sa taxi niini tungod kay traffic.

Sumala pa ni Gonzales wala mosugot si Lawrence nga sa laing tambalanan dad-on ang igsuon kay didto man kini nagpa pre-natal ug didto sab nagpa package deal ang manghod niini alang sa iyang pagpanganak.

Sa dihang di na kaya ni Jackilyn ang pagpugong sa iyahang sitwasyon, nangaratol ang mga polis hinungdan nga ang ilang hepe nga si Senior Inspector Rodgene Pudotan mimando kang Gonzales nga ang patrol car maoy gamiton aron madala sa maong hospital ang ginang.

Matud ni Gonzales nga maayo nalang nga naa si Josie Tejano,  usa sa mga Non-Uniformed Personnel ug lisensyadong nurse sa ilahang estasyonan niadtong tungora ug mitabang sa babaye.

Apan bisan sa ilang pagwangwang nabara gyud sila sa traffic pagabot sa Barangay Basak.

Matud pa ni Tejano sa Banat News nga mihangyo na gyud si Jackilyn kaniya nga didto nalang gyud kini manganak sa patrol car kay di na niya kaya. Si Jackilyn diha sa front seat maglingkod tungod niini nipadaplin ang patrolcar ug gitabangan ang ginang.

“While ako siya gi comfort, niana siya nga ‘maam, feel nako naa na jud ang ulo sa bata, maam hubui nalang ko. Mao ‘to ako siya gihuboan sa iyahang lower nga pants, ako siya gipabuka gamay, naa naman gyud ang ulo sa bata,” matud ni Tejano kinsa naahat nga nahimong mananabang.

Tungod sa kapaspas sa mga hitabo ug walay medical kits sa patrolcar gawas sa usa ka surgical glove ug surgical mask, ang tualya ug jacket nalang sa drayber maoy ilang gigamit pagsawod sa masuso.

Usa ka himsog ug normal nga batang babaye ang gihimugso ni Jackilyn sa patrol car, matud ni Gonzalez.

“Pag-abot sa hospital, igo nalang naglimpyo ug nagputol sa pusod, bilib sad ko atong bayhana kay isog kaayo,” matud niini.

“Sus, gi guide-an mi sa Ginoo, ang bata igo ra gyud nakaabot sa hospital, igo ra nakagawas sa mobile,” dugang niini.

Mao kini ang unang higayon nga nakasugat  og ingon niining alarma silang Gonzales ug Tejano ug may tambag siya sa mga kabatan-onan.

“Sukad sukad, first time gyud ‘to nako. Mao ayaw gyud mo kasuko sa inyo ginikanan, kay ang atong ginikanan manganak sus, di na gyud ma-porma. Salamat sad mi sa among hepe nga iyaha mi gigiyahan,” matud ni Gonzales. -/IBM (BANATNEWS)