Babaye nanion og armas sa igsoon
CEBU, Philippines — Nagtingkagol sa detention cell sa Cordova Police Station ang usa ka babaye nga gireklamo sa kaugalingon niining igsoon nga babaye sa Sitio Mahayahay, Barangay Gabi, Lungsod sa Cordova alas 9 pasado kagahapon sa buntag.
Si Police Officer 3 Vilma Degamo sa Cordova Police Station niila sa nadakpan nga si Jennifer Casul Miano, 29-anyos, minyo nga nagpuyo sa maong dapit.
Matud ni Degamo nga gikalalis sa suspek ang iyang manghud nga babaye nga si Isabel Bracero Miano.
Nunot sa mainiton nilang panaglalis wala na kapugong ang suspek sa iyang kapungot ug dali kinining nisulod sa ilang panimalay ug pipila ka gutlo ang nakalabay nibalik kini og gawas ug giduol ang iyang manghud dungan ang pagtion og armas.
Ang igsoon nga gibati og hilabihan nga kahadlok ang dali nga nisaka sa ilang panimalay ug nangayog panabang sa kapolisan pinaagi sa pagtawag sa telepono.
Nahidangat sa maong dapit ang mga polis ug naabtan pa nila ang suspek sa gawas sa panimalay nga nagbitbit pa sa armas nga kalibre .38 nga maoy hinungdan sa iyang pagkasikop. (BANAT NEWS)
- Latest
