CEBU, Philippines — Wala mabalaka si Bise Gobernador Agnes Magpale kon iendorsar ni Presidente Rodrigo Duterte ang iyang kaatbang sa guberanatorial race si Kongresista Gwendolyn Garcia.
Si Duterte nagpatawag og tigom sa mga kandidato sa probinsiya nga kasagaran sakop sa Partido Demokratiko Pilipino - Lakas ng Bayan (PDP-Laban). Si Magpale kandidato sa Barug Alang sa Kauswagan ug Demokrasya (BAKUD) sa kinto distrito ug sa Nationalist People’s Coalition (NPC).
Samtang si Garcia kandidato sa One Cebu ug PDP-Laban.
Si Magpale giingong apil sa gusto ikatagbo ni Duterte, apan sa pagsulat niining balita naghulat pa sila og imbitasyon.
Ang anak sa presidente nga si Davao City Mayor Sara Duterte-Carpio niendorso ni Magpale ug Garcia pagka gobernador maong mahulog nga “free zone” ang probinsya sa 2019 midterm elections.
Si Magpale nagkanayon nga sa lalawigan sa Sugbo dili momenus upat ka mga distrito kansang mga political leaders nipadayag na og suporta sa ilang kandidatora. (/IBM)(BANATNEWS)