CEBU, Philippines – Patay ang usa ka 25-anyos nga inahan ug angol ang anak niini ug kapuyo human ang ilang gisakyan nga motorsiklo aksidenteng nabangaan og laing sakyanan kagahapon sa kadlawon diha sa South Road Property (SRP), Barangay Mambaling, Dakbayan sa Sugbo.
Ang nakalas mao si Abegail Uy, 25-anyos samtang ang kapuyo niini nga si Joseph Lyndon Balangigue, 22 ug ilahang usa ka buwan nga anak nga si Liam Nyjah Balangigue ang naangol sa maong hitabo. Ang tulo mga residente sa Bo. Luz, Dakbayan sa Sugbo.
Ang drayber sa Mazda Bongo nga adunay plaka nga AEB-7979 giila nga si Martel Ronald Banga, 27, taga Sitio Mangga, Barangay Casuntingan, Dakbayan sa Mandaue gitanggong kini sa kapolisan sa Traffic Group.
Si Police Officer 2 Jimwel Nuñez, desk officer sa Traffic Group nagkanayon nga pareho nga nagbiyahe sa samang direksiyon padulong sa habagatan nga bahin ang motorsiklo ug sakyanan.
Giingong nadum-bolan ni Banga ang motorsiklo nga gisakyan sa mga biktima hinungdan sa pagkalagpot sa mga sakay niini ug naguroy ang motorsiiklo sa sakyanan tungod kay wala dayon makapreno si Banga.
Dali nga gidala ang mga biktima ngadto sa Vicento Sotto Memorial Medical Center apan pipila ka gutlo gideklarar sa doktor sa maong tambalanan nga patay na si Uy samtang ang bata gibalhin ngadto sa pribado nga tambalanan. (/BDB)(BANAT NEWS)