CEBU, Philippines – Gilihok na sa mga opisyal sa Barangay Buhisan, Dakbayan sa Sugbo ang relocation site alang sa mga apektadong residente sa Sitio Sandayong gumikan sa nakitang pagpangliki sa yuta sa dapit.
Si Barangay Kapitan Gremar Barete niingon nga nakigsabot sila sa tag-iya sa duha ka giilang relocation area nga nahimutang sa Sitio Dulhugan ug Sitio Tubod.
Ang maong lugar ipaubos pa sa inspeksiyon sa Cebu City Disaster Risk Reduction and Management Office.
Ang pagpangliki sa yuta giingong resulta sa pagtay-og sa 7.2-magnitude nga linog niadtong 2013.
Ang pangulo sa CCDDRMO, Nagiel Bañacia, nakig-alayon sa barangay sa pagpangita og relocation site ug ang siyudad adunay igong pundo alang sa maong katuyoan.
Si Cebu City Mayor Tomas Osmeña nipahibawo nga ang siyudad naa sa proseso sa pag-relocate sa mga residente nga duol sa nakit-an nga mga liki.
Matud ni Barete nga 80 porsiyento sa mga molupyo sa dapit ang kinahanglan gyud pasabton nganong kinahanglan ma-relocate sanglit naa lang sa 20 porsiyento ang giingong andam mo-relocate.
Aron mapasabot gyud ang mga tawo nagplano ang kapitan nga makigtigum sa mga residente uban sa CCDRRMO ug Mines and Geosciences Bureau 7. (/GMR)(BANAT NEWS)