29 ka pamilya lang sa Lagtang ang ma-relocate

CEBU, Philippines – Mga 29 ka pamilya sa Sitio Tiguib, Barangay Lagtang, Dakbayan sa Talisay nga apektado sa quarry operation giingong mao lang ang posibleng mahatagan og relocation site sa QM Builders.

Si Alan Quirante, tag-iya sa maong kompaniya nagkanayon nga ang nahisgutang 29 lang ka pamilya ang ilang mahatagan base sa ilang pagsusi sa lugar nga duol sa disgrasya.

Gikataho nga 60 ka pamilya ang apektado apan si Quirante nipasabot nga ang 29 ka pamilya mao lang ang duol sa peligro kong adunay mahitabong pagdahili sa yuta sa gipahigayon nilang quarry operation.

Nunot niini, si Gobernador Hilario Davide, III sa iyang pagbisita kagahapon diha sa Tabunok Sports Complex iyahang gipasalig ngadto sa mga apektadong pamilya nga andam ang Probinsiya sa Sugbo sa paghatag og tabang.

Adunay giumol nga technical committee aron mapaspasan ang paghatag og tubag sa mga residente.

Samtang sa Dakbayan sa Sugbo, ang pangulo sa Cebu City Disaster Risk Reduction Management Office (CCDRRMO) Nagiel Bañacia  nagkanayon nga magbutang sila og warning sign diha sa duha ka lugar sa Sitio Sandayong, Barangay Buhisan nga naila nga landslide prone area.

Kini isip mitigating measures gumikan sa presensiya sa pagpangliki sa yuta nga resulta sa 7.2 magnitude nga linog niadtong 2013.

Sayo pa, ang CCDRRMO nagpahigayon og ocular inspection sa maong dapit aron pagtubag sa kalabaka sa mga residente gumikan sa nakita nila nga pagpangliki sa yuta.

Apan wala una gibutyag ni Bañacia ang ilang assessment report sanglit nagkinahanglan pa kini sa revalidation sa Mines and Geosciences Bureau (MGB)-7.

Dugang ni Bañacia nga ang ilang buhatan nakig-alayon sa barangay sa pagpangita og relocation site alang sa 300 ka indibidwal nga apektado. - Decemay P. Padilla/BDB (BANAT NEWS)