CEBU, Philippines – Sa pagsaulog sa World Polio Day karong Oktubre 24 ang Rotary International District 3860 mopahigayon og libreng bakuna sa polio diha sa upat ka dagkong health center sa Siyudad sa Sugbo.
Ang kadagkuan sa maong organisasyon niawhag sa mga inahan ug guardian nga dalhon ang ilang mga anak diha sa health center sa Barangay Inayawan, Lahug, Tejero, ug Tisa aron ang ilang mga anak malikay sa sakit nga polio.
Ang Rotary International District 3860 nga nag-adbokasiya sa pagsumpo sa polio nagkig-alayon sa Department of Health (DOH)-7, Cebu City Health Office ug sa Cebu Provincial Health Office alang sa maong kalihukan.
Si Benjamin Garcia, Rotary International District 3860 governor nagkanayon nga nabalaka sila nga posibleng mahibalik ang sakit nga polio dinhi sa nasud.
Ang DOH-7 nibutyag nga nikunhod ang porsiyento sa mga bata nga nakadawat sa polio vaccine human sa kontrobersiya sa Dengvaxia o ang dengue vaccine.
Si Dr. Jeanette Pauline Cortes sa DOH-7 nipasalig sa mga ginikanan nga safe ang polio vaccine ug napamatud-an kini tungod kay gigamit na kini sukad pa niadtong 1970’s.
Si Dr. Jose Boy Unabia, Rotary International District 3860 assistant governor nagkanayon nga walay tambal ang polio apan malikayan kini pinaagi sa pagpabakuna. (/BDB)(BANAT NEWS)