CEBU, Philippines — Hingpit na nga nakabiya sa Sugbo ang wala madugta nga kasingkasing ni Santo Padre Pio kagahapon sa buntag agi sa Mactan Benito Ebuen Airbase sakay sa pribado nga eroplano.
Usa ka misa panamilit ang gihimo sa wala pa kini mobiya sa International Eucharistic Congress nga gitambungan sa liboan ka mga magtutuo ni Santo Padre Pio.
Nangulo sa Santos nga Misa si Auxiliary Bishop Dennis Villarojo, ang team moderator sa Capitol Parish, kinsa niingon nga bulahan ang Sugbo nga usa sa mga nabisitahan sa wala madugta nga kasingkasing ni Santo Pio.
Sumala pa ni Villarojo nga matag usa ka tawo adunay nagkadaiyang giatubang nga problema apan sama sa giingon ni Santo Padre Pio, dili kalimtan ang pag-ampo, paglaum ug dili angay mabalaka kay adunay “divine intervention”.
Human sa misa gisunod dayon ang pagdala sa kasingkasing ni Santo Pio paingon sa Dakbayan sa Lapu-Lapu kuyog ang kaparian nga Franciscan Capuchin.
Mga magtutuo emosyonal sa pagbiya ni Santo Padre Pio.
Matud ni Marie Balansag, magtutudlo sa Mambaling Elementary School, nga dili niya masabot ang iyang gibati sa dihang nakayukbo siya sa kasingkasing ni Santo Pio.
Dugang ni Balansag nga aduna siyay nasinating kalipay sa kinahiladman sa iyang kasingkasing.
Si Athan Lungip, usa sa mga youth advisers, nipadayag nga susama siya og anaa sa langit sa dihang naka-venerate ni Santo Padre Pio.
Malaumon si Balansag ug Lungip nga makapuyo sama sa mga panag-ingnan ni Santo Padre Pio bisan sa daghang hagit niining kalibutan.
Sa kinatibuk-an malinawon ang pag-abot ug pagbiya ni Santo Padre Pio nga gikalipay sa mga Franciscan Capuchin Fathers nga maoy nagdala sa wala madugta nga kasingkasing niini sa pagsuroy sa Pilipinas sulod sa 20 ka adlaw.
Hapit alas 10 kagahapon sa buntag hingpit nga niabot sa Ateneo de Davao ang kasingkasing ni Santo Padre Pio alang sa ipahigayon nga public veneration. (BANAT NEWS)