MCPO, kagamhanan nangandam batok mga hulga

CEBU, Philippines — Nagkahiusa ang Mandaue City Police Office (MCPO) ug lokal nga kagamhanan sa dakbayan sa pagpangandam batok sa mga hulga sa pagpamomba hinungdan nga gihimo ang hiniusang pagbansay-bansay.

Nunot sa gihimo nga mga pagbansay-bansay nga giapilan sa kapolisan ug mga pinili nga mga kawani sa kagamhanan ilang nakita ang mga panginahanglan sa pagbaton og mga kahimanan nga naglakip sa handheld radio, K-9 o bomb sniffing dogs, mga imbestigador ug uban pa. Si Mandaue City Police Office (MCPO) Director, Senior Supt. Julian Entoma, niingon nga ang maong matang sa kahimanan ang labing gikinahanglan karon sa MCPO alang sa pagpalig-on sa kapolisan ingon man sa City Disaster Risk Reduction and Management Office sa pagtubag sa mga hulga sa pagpamomba ug pagluwas sa kinabuhi batok sa maong panghitabo.

Gihisgutan ni Entoma ang maong mga butang human usab sa kalampusan sa gipasiugdahang bomb explosion simulation exercise (Simex) niadtong niaging Sabado nga gipahigayon sa dakbayan.

Ang gipasiugdahan nga Simex nga nilungtad og usa ka oras ug tunga ang giapilan sa 90 ka personnel ug mga kawani sa kagamhanan.

Hinoon si Entoma niingon nga mopadala sila og hangyo sa Police Regional Office (PRO-7) alang sa maong mga kahimanan alang sa pagpausbaw sa ilang kapabilidad sa MCPO sa pagtubag og mga alarma ingon man imbestigador ug mga K 9  bomb sniffing dogs ug mangayo sab sila og ayuda sa lokal nga kagamhanan sa dakbayan. (BANAT NEWS)