Dili mopalit og substandard nga Christmas decors—DTI
CEBU, Philippines — Nunot sa nagkaduol na nga pagsaulog sa Pasko ug Bag-ong Tuig ang Department of Trade and Industry (DTI)-7 nipahimangno sa mga konsumidor nga dili mopalit og mga substandard nga Christmas decor sama sa Christmas lights.
Si DTI-7 director Asteria Caberte nipahinumdom sa mga konsumidor nga magmabinantayon sa pagpalit og Christmas decors ilabi na sa Christmas lights diin kinahanglang siguradohon nga nipasar kini sa standard o adunay marka nga ICC ug Product Standard ang ilang paliton nga produkto.
Ang mga substandard nga Christmas decor giingong usa sa mga hinungdan sa sunog.
Matud ni Caberte nga angayang magduda ang mga konsumidor kong ang presyo sa produkto barato kaayo ug pwede kining i-report ngadto sa ilang buhatan alang usab sa mga kasayoran kong nakapasar ba kini sa mandatory standard.
Matud usab ni Caberte nga kabahin sa ilang adbokasiya sa Consumer Protection nga kinahanglang paliton nga mga Christmas décor kadtong nituman sa mandatory standard, dunay ICC ug PS mark ug angayang adto mamalit sa mga pormal nga establisamento.
Ang DTI-7 aduna kini team nga nag-monitor pagsuta kong ang mga tindahan wala ba mamaligya og substandard nga Christmas decors.
Ang mga masakpan nga nagbaligya og mga substandard nga Christmas decors mag-atubang kini og silot. Subay usab niining nagkaduol nga holiday season si Caberte nagkanayon nga ilang gilauman nga mosaka ang presyo sa mga noche buena items sa buwan sa Nobiyembre hangtud na sa Disyembre. (/BDB)(BANATNEWS)
- Latest
