Lima ka balaod ni Padre Pio angayang sundon

CEBU, Philippines — Giawhag sa Arsobispo sa Calbayog Isabelo Abarquez, DD ang mga magtutuo ni Padre Pio nga sundon ang lima ka balaod sa Santos alang sa spiritual growth.

Kagahapon sa buntag liboan ka magtutuo ni Padre Pio ang nitambong sa gipahigayong Santos nga Misa nga gipaluyohan sa St. Padre Pio Communities in the Visayas nga gipahigayon diha sa International Convention Center.  Matud ni Abarquez nga ang lima ka balaod alang sa spiritual nga kalamboan naglangkub sa “weekly confession”, diin angay sutaon sa katawhan kong kanus-a ang kataposan niyang pagpangompisal, ikaduha  ang “close union with God” ug ikatulo ang “daily spiritual reading” diin pipila lang ang adunay kahigayonan  nga mobasa niini tungod kay karong panahona ang katawhan mas adunay panahon sa pagbasa ug pag-post sa ilang mga social media,ikaupat mao ang “daily regular meditation” ug ang kataposan mao ang “examination of conscience”.

Si Abarquez niawhag usab sa katawhan nga iampo sa Ginoo kanunay uban sa pangaliya sa Mahal nga Birhen Maria ug Padre Pio nga kanunay ihatag ang mga grasya nga gipangaliya uban sa pagsunod sa lima ka sumbanan sa spiritual growth.

Human sa Santos nga Misa kagahapon nagpadayon gihapon ang veneration sa katawhan ngadto kang Padre Pio hangtud na sa kagabii diin adunay mga misa usab nga gi-schedule ang gipahigayon

Karong alas 6:00 sa buntag ipahigayon na ang farewell mass uban ni Most Reverend Dennis Villarojo, Auxiliary Bishop of Cebu sa dili pa kini dalhon padulong ngadto sa Davao. (/BDB)(BANATNEWS)