Quarry sites padayong gisusi

CEBU, Philippines – Giapas karon sa Provincial Environment and Natural Resources Office (PENRO) nga mahuman ang ilang assesment sa mga quarry site o permittees sa probinsya sa Sugbo sa dili pa  matapos ang 20 ka adlaw nga gihatag ni Gobernador Hilario Davide III. Dili momenus 18 na ka quarry sites ang nasusi sa PENRO uban sa Mines and Geosciences Bureau (MGB) gikan sa 35 ka quarry permittes sa tibuok lalawigan.

Base sa ilang assesment, aduna silay “technical” nga rekomendasyon ngadto sa mga operator pagsiguro nga luwas ang operasyon niini.

Matod ni PENRO head Jayson Lozano nga ang uban sa mga operator gihatagan nila og 30 ngadto sa 90 ka adlaw aron mosunod sa mga rekomendasyon sa PENRO depende kini sa kon unsay nakita nga angay palamboon.

Gitataw usab ni Lozano nga dili sila makapatuman og massive lifting sa suspension sa mga quarry operation sanglit mag depende man usab kini sa kondisyon sa quarry site.

Subay sa maong kalambuan, padayon ang pag-ampo sa simbahang Romano Katoliko taliwala sa pagsulay nga giatubang sa katawhan ug pagsalig sa labaw nga makagagahum.

Kini maoy mensahe ni Auxiliary Bishop Oscar Florencio atol sa pagsaulog niini sa santos nga misa subay sa ika-189 ka tuig nga kapistahan ni St. Francis de Assisi sa Dakbayan sa Naga.

Matud ni Florencio, taliwala sa mga panghitabo sama sa mga katalagman ug pagsuway angay lamang ang katawhan dili mawagtangan sa ilang pagtuo ug pagsalig sa Ginoo, kay kini lang ang nakahibalo sa tanan. (Rowena D. Capistrano/DILT)(BANAT NEWS)