CEBU, Philippines — Magdungan sa pagpangayo og usbaw sa plitehan ang Cebu Provincial Bus Operators Association ug Cebu South Mini-Bus Operators Association karong adlawa sa buhatan sa Land Transportation Franchising and Regulatory Board 7. Ang tigpamaba sa CPBOA ug presidente sa CSMBOA Julieto Flores nibutyag nga usbaw nga P4 ang ilang pangayoon diin ang P6 sa unang lima ka kilometros mahimo na nga P10 ug ang P1.20 mahimo na nga P1.50 sa mosunod nga matag kilometro.
Ang kamahal na sa presyo sa krudo ug mga piyesa sa sakyanan ang gitumbok ni Flores nga rason sa pagpangayo og usbaw sa plitehan.
Niadto lang Pebrero nipausbaw sa ilang plitehan ang mga bus operators gikan sa P5 ngadto na sa P6 sa unang lima ka kilometros ug ang P1 ngadto na sa P1.20 sa matag mosunod nga kilometro.
Ang maong usbaw giingong mas ubos sa giaprobahan sa LTFRB nga P8.50 sa unang lima ka kilometros ug P1.45 sa matag mosunod nga kilometro.
“Di na gyud madala, mahal na gyud kaayo ang presyo sa lana. Pila na ka tuig, nag-undercharged mi sa among plitehan,” matud ni Flores. Si LTFRB-7 Director Eduardo Montealto nagkanayon nga itakda nila ang public hearing kung masang-at na ang maong petisyon.
Gani karong Oktubre 15 sa ala una sa hapon gikatakda ang public hearing sa petisyon sa Basak-Lapu-Lapu City Jeepney Operators and Drivers Association kinsa nangayo og P2.50 nga provisional fare hike diin ang minimum nga plitehan nga tag P6.50 mahimo na nga P9 alang sa mga jeepney sa Central Visayas. (BANAT NEWS)