CEBU, Philippines — Gitan-aw ang kontrobersiyal nga Balili property nga mas haum isip relocation site sa mga apektado sa landslide sa Dakbayan sa Naga base sa pakisusi sa team sa Mines and Geosciences Bureau.
Kini sumala pa ni Naga City Mayor Kristine Vanessa Chiong base sa report nga iyang nadawat gikan sa MGB sa kaulohan.
Hinoon ipaubos pa kini sa engineering mitigation sama sa proper drainage ug uban pa base sa mandato sa balaud.
Ang 270 ka istraktura nga anaa sa critical zone ang gi-validate sa MGB Manila.
Sa pagkakaron gibutangan na og ilhanan ang maong mga istraktura.
Gimanduan na usab sa mayor ang City Administrator ug City Assessor sa pag-finalize sa listahan sa mga pamilya nga nalakip sa 270 aron mapadali nga ma-prioritize sila sa relocation.
Nakig-alayon sab si Chiong kang DENR-7 Director Gilbert Gonzales aron pakisayran kung mahimo na ba nga makabalik ang mga pamilya nga gawas sa critical zone apan ang MGB padayon pa nipahigayon og pakisusi hinungdan nga magpaabot pa siya sa resulta.
Dugang ni Chiong nga nipadala na siya og suwat sa buhatan sa PAGASA ug Phivolcs aron magpakisayud sa Balili property nga maoy himoon nilang permanent housing site nga idonar sa Kapitolyo.
Ang mayor nipadayag nga kadtong mga namuyo sa lugar nga gitawag na karon og “no build zone” maoy unang hatagan og prayoridad.
Ang National Housing Authority gipaabot usab nga mobubo og pundo alang sa katukuran sa housing sa Balili property.
Lakip sa gisugyot nga relocation site sa kagamhanan sa Dakbayan sa Naga ang luna sa Gawad Kalinga ug uban pa apan ang Balili property nakit-an nga haum.
Si Gobernador Hilario Davide III gikatakda nga mosusi karong adlawa sa Balili property. (BANAT NEWS)