Kabalayan naugdaw

CEBU, Philippines – Usa ka dakong sunog ang milamoy sa gibanabanang 115 ka mga panimalay sa Sitio Cahipa ug Bakante, sa Barangay Hipodromo ning Dakbayan sa Sugbo kagahapon sa hapon.

Sagad sa mga panimalay ginama sa gaay ug nakadugang ang kusog nga hangin sa paspas nga pagkatap sa kalayo sa kabalayan. Ang alarma nadawat sa Bureau of Fire and Protection-7 alas 3:10 sa hapon nga giingong nagsugod sa panimalay nilang Ramie Inopiquez ug Allan Betache. Wa hinuoy nakalas o naangol sa maong insidente.

Ang BFP naghimo pa og imbestigasyon pagsusi kon unsa ang hinungdan niini. Ang alarma giisa ngadto sa Task Force Alpha hinungdan sa pagresponde sa tanang kabomberohan sa siyudad ug mga silingang siyudad.

Sa pagbanabana sa BFP, moabot P2 Milyones ang danyos niini. Apil sa nasunog ang duha ka sakyanan ug ancestral house sa pamilya ni self-confessed drug lord, Kerwin Espinosa.

Si Emma Espinosa, bilas ni kanhi Albuera, Leyte Mayor Rolando Sr. miingon nga upat ka pamilya diha sa ilang compound ang apektado.

“Wala na gyud mi nasalbar pero pasalamat mi kay walay casualties sa family ug sa among lugar,” matud niya sa mga tigbalita.

Apil sa naugdaw ang balay ni Hipodromo Barangay Kapitan Roperto “Dondon” Bacolod.  Matud ni Bacolod, ang Sitio Cahipa adunay gibanabanang dos mil ka molupyo.

Gideklarar sa konseho sa barangay kagabii nga ipaubos sa state of calamity ang nasunogan aron magamit nila ang disaster fund ug makapalit og gamit sa mga nasunogan.

Adunay bahin sa nasunog nga lugar ang gipanag-iya og pribadong tawo, samtang naapil og kasunog ang kapilya niini.

Matud pa ni Bacolod  gusto nilang ipaubos sa reblocking ang maong dapit aron madugangan ang agianan. Samtang si Nagiel Bañacia, pangulo sa CDRRMO nagkanayon naglisud gyud   ang kabumberohan tungod sa kahagip-ot sa lugar.

Si Kagawad Joseph Baylosis miingon nga kadaghanan sa mga balay nga naugdaw ginama sa gaay maong paspas kaayo kining nikatap.

Si Bise Mayor Edgardo Labella kinsa daling miabot sa lugar miingon nga motabang ang siyudad sa mga nasunogan pinaagi sa tag P20mil nga financial assistance.

Ang Department of Social Welfare and Services Head gipaabot nga manghatag usab og tulo ka adlaw nga packed meals sa mga apektadong pamilya ug makig-estorya usab si Labella sa Division for the Welfare of the Urban Poor officials nga tabangan ang mga nasunogan kon makatukod pa sila pagbalik sa ilang dapit. (Rowena Capistrano ug Gabriel Bonjoc/IBM) (BANAT NEWS)