Mga hayop gipang-abandonar

CEBU, Philippines — Niabot na sa 46 ang natala nga patay sa landslide sa Sitio Tagaytay ug Sindulan, Barangay Tinaan, Dakbayan sa Naga hangtud sa alas 12:45 kagahapon sa hapon.

Samtang ang wala pa igkita nga mga tawo anaa na lang sa 44 gikan sa 64 sumala pa sa Provincial Disaster Risk Reduction and Management Office (PDRRMO).

Ang mga namakwit nga anaa sa mga evacuation centers niabot na sa 4,138 kagahapon.

Nunot sa binakwitay, ubay-ubay nga mga buhi nga kahayupan ang gipang-abandonar sab sa mga tag-iya  na samtang nanimaho na sab ang lugar nunot sa mga patay nga hayop.

Nasayran nga ang mga rescuers nireklamo na kagahapon tungod sa nangabaho na nga mga nangamatay nga mga hayopan  maong ilahang gipanghipos ug gilubong.

Samtang adunay daghang naglaroy-laroy nga mga hayopan sama sa iro, iring, mga kanding ug uban pa nga ilang gipakaon tungod kay wala na ilang mga tagiya tungod sa pagbakwit.

Samtang pabor si Cebu Archbishop Jose Palma nga adunay ipahigayon nga linawom nga imbestigasyon sa nahitabong pagdahili sa yuta sa Sitio Tagaytay ug Sindulan, Barangay Tinaan, Dakbayan sa Naga.

Matud ni Palma nga usa ka maayong lakang ang pagpahunong una sa mga quarry operations ug pagmina aron mapahigayon ang tukma nga imbestigasyon.

Gitug-an ni Palma nga angay ug tukma lang nga adunay ipahigayon nga linawom nga imbestigasyon tungod kay kinahanglan usab makabaton og hustisya ang mga kabanay nga adunay mga nitaliwan sa kinabuhi ug ilabi na para sa mga biktima sa maong katalagman.

Ang mga pamilya sa mga nakalas ug nawagtangan pa og pipila ka kabanay ang nanawagan sab og tukma nga imbestigasyon.

Nimando si Presidente Rodrigo Duterte nga ihunong una ang mga quarry ug pagmina samtang imbestigasyon ipahigayon. (BANAT NEWS)