May warrant tipi sa polis
CEBU, Philippines — Patay ang usa ka lalaking may warrant of arrest sa kasong pagpatay human giingong nipusil sa mga polis nga mosikop unta kaniya diha sa Barangay Labogon, Dakbayan sa Mandaue alas 6 pasado ang takna sa miaging Sabado sa gabii.
Si Senior Inspector Rodgene Fodutan sa Presinto 3 sa Mandaue City Police Office (MCPO) miila sa namatay nga mao si Alejandro Briones, 41, taga Sitio Lomboy sa nahisgotang barangay.
Matud pa ni Fodutan nga ila untang dakpon ang suspetsado pinaagi sa warrant of arrest nga giluwatan ni Judge Mercedita dadole-Ygnacio, sa Regional Trial Court (RTC) 7 sa Mandaue City tungod sa kaso niining pagpatay.
Giingon nga giawhag unta sa mga polis si Briones nga motahan sa iyang kaugalingon apan wala kini manumbaling hinuon dali kining miibot sa iyang armas ug gipusil ang mga polis.
Suwerte nga daling nakahupo ug wala mangaigo ang mga polis ug daling nakabawos pagpusil kaniya sa dihang midagan na kini pag-ikyas.
Nakuha diha sa crime scene ang siyam ka gagmay nga paketeng shabu, P6,600 nga salapi ug kalibre 38 nga rebolber.
Matud pa nga si Briones maoy gitumbok nga suspetsado sa pagpusil-patay kang Leonard Dalaguit sa miaging tuig.
Ang napatay nalakip usab sa drug watchlist personalities sa Barangay Jagobiao ug dugay nang gi-monitor sa kapolisan. (BANAT NEWS)
- Latest
