Press Freedom Week gibuksan

CEBU, Philippines — Hingpit na nga gibuksan kagahapon sa buntag ang usa ka semana nga kalihukan sa ika-26 nga Cebu Press Freedom Week.

Ang kalihukan gisugdan sa usa ka Santos nga Misa nga gipangulohan ni Auxiliary Bishop Dennis Villarojo, team moderator sa Capitol Parish; Msgr. Joseph Tan, tigpamaba sa Archdiocese of Cebu ug Fr. Felmar Fiel, SVD, assistant general manager sa DyRF.

Matud ni Villarojo atol sa iyang homiliya nga ang tinuoray nga kahulugan sa press freedom mao ang paghimo sa insakto bisan ang uban naghuna-huna og sayop, pagtug-an sa kamatuoran bisan ang uban dili motoo, pagsulti sa tarung ug matinahuron bisan og balik-balik kini paminawon, paghupot sa kamatuoran sa handurawan bisan og nalimtan na sa uban ug pagpaatubang sa mga sakop sa media sa ilang mga nahimo tungod kay walay si bisan kinsa nga luwas gikan sa silaw sa kamatuoran.

Gipahimug-atan sa Obispo ang iyang homiliya, hagit sa tanan ug ilabi na sa mga sakop sa media kay mao kini ang ilang tahas sa pagpabuka sa mga ni bisan kinsa aron sa pagbutyag sa kamatuoran. Dugang ni Villarojo nga kabahin gihapon sa media ang pagpadangat dili lang may labot sa politika apan pagpahibalo usab sa kahimtang ilabi na sa mga biktima sa katalagman aron masayud ang uban nga mga dapit nga mahimong makapadangat sa ilang hinabang.

Awhag ni Villarojo nga mag-ampo usab alang sa mga biktima sa bagyo bisan layo ra tungod kay kabahin usab sila sa katilingban. Human sa Santos nga Misa gisunod ang pasundayag gikan sa The Freeman/Banat News, Sunstar/Superbalita, Cebu Daily News ug Kapisanan ng mga Brodkaster ng Pilipinas nga maoy niguwa nga champion sa presentation.

Bisan og ang tanan dili mananaug sa raffles apan malipayon gihapon kining nanguli ug naghugoy-hugoy sa ilang mga higala. (BANAT NEWS)