CEBU, Philippines — Gipakita sa asawa sa napatay nga jail guard nga si Bernie Bayotas ang ilang kapobrehon human siya sakiti sa pasangil nga ang iyang bana nalambigit sa ilegal nga drugas sulod sa Cebu Provincial Detention and Rehabilitation Center.
Si Grace Bayotas, 51, nipakita sa karaan nila nga apartment nga diin sila nag-abang sulod na sa 21 ka tuig nga ilang gibahin ug paabangan sa lain aron makatapal-tapal sa ilang gasto ug sa abangan.
Nangandoy og TV
Dunay sari-sari nga paninda sud sa iyang sala si Grace aron pag-abag sa sweldo ni Bernie nga P16 mil matag buwan.
Matud ni Grace nga plano ni Bernie nga makapalit bisan og telebisyon sa iyang pagretiro sa serbisyo karong Septiyembre 30 human sa 26 ka tuig nga pagserbisyo isip jail guard sa CPDRC.
Si Chief Insp. Eduard Sanchez, hepe sa Guadalupe Police Station, unang namahayag nga ang piniriso nga si Jerryfer Perigrino ang ila gituohan nga maoy target sa mamumuno apan ilang gilakip sa imbestigasyon ang kamatayon nilang Bayotas ug laing jail guard nga si Joel Teves nunot sa pasangil ni Jail Warden Reynaldo Valmoria nga nalambigit sila sa pagpalusot og kontrabando sa CPDRC.
“Sa iya serbisyo sa nasud, imbes labanan sa warden, gi-involved naman hinoon sa illegal. Ngano diay warden naa kay kalibutan sa ambush?” matud ni Grace.
Si Bernie gikan sa pamilya sa mga sundalo ug polis sa Negros Occidental. Kanhi sakop sa Philippine Army sulod sa lima ka tuig apan gipapauli siya sa iyang mama human napatay ang iyang igsoong sundalo sa engkwentro tali mga rebelde sa Tayabas, Quezon Province.
Nisulod sa pagka- jail guard sa CPDRC si Bernie sa panahon ni anhing gobernador Vicente “Tingting” dela Serna kinsa iya sab naalagaran isip escort.
“Wa ko magtoo nga anhi siya madisgrasya sa way hinungdan,” matud ni Grace. Gipadayag ni Grace nga hangtud karon nagkapangka-pangka sila sa utang bisan wala silay anak ni Bernie.
Usa sa naproblemahan karon ni Grace ang pagdala sa patay’ng lawas ni Bernie ngadto sa iyang yutang natawhan sa Calatrava, Negros Occidental.
May utang
Si Bernie nagbilin sab og utang nga P10,000 sa Cebu CFI Community Cooperative samtang ang iyang motorsiklo walo pa ka buwan nga nadatahan ang tulo ka tuig nga kontrata.
Una na nga nadisgrasya si Bernie sa motorsiklo pipila ka tuig ang nakalabay apan usa ka Dr. Robinson Uy ang nitabang aron ma-stainless ang iyang nabali nga bitiis.
Matud ni Grace nga magpakahilom lang unta siya apan nasakitan siya sa nanggawas nga balita.
“Nganong karon pa man? Di na katubag akong bana kay patay na. Imbes pangitaon nila ang nagpatay, kami naman hinoon ang hatagan og sala,” matud niya.
Nagduda sab si Grace nganong si Bernie ang gipakuyog kang Perigrino kinsa usa ka high-profile nga piniriso sa sunod nga adlaw nga kini gipagawas sa prisohan ingon man ang pagpawong sa close-circuit television (CCTV) camera sa lugar sa nahitaboan.
Person of interest
Sa pikas bahin, gitug-an sa hepe sa Cebu City Police Office nga si Police Senior Supt. Royina Garma nga wala na nila makit-i ang person of interest sa ambush sa Kalunasan apan gituohang wala pa nakagawas sa Sugbo.
Sigun pa ni Garma ang maong tawo positibong gitumbok sa usa ka nagpailang saksi sa maong krimen. Ilaha usab gisusi kon kaning testigo kasaligan ba gyud.
“We are making sure na itong witness ay witness talaga o baka fall guy lang tong tinuturo niya,” ang maong hepe miingon.
Wa malambigit
Samtang usa sa mga kaubang prison guards sa namatay nga duha ka gwardiya nagkanayon nga di tinuod ang mga pasangil sa duha sa pagpalusot og illegal nga drugas sa CPDRC.
Ang maong jail guard kinsa mihangyong itago ang iyang pangalan nagkanayon nga sa 24 ka tuig niya nga pagpanerbisyo nakaila na gyud siya og maayo sa duha ka mga nakalas nga kauban.
“Nakuridas gyud to sila duha. Mga maayong tawo kaayo na sila oy. Mga inosente kaayo. Wa ko magdahom, hilak gud ko,” padayag sa maong jail guard.
Matud niya, kon siya pay natahasang mo-escort sa napatay nga inmate nga si Jerryfer Perigrino nagtuo siyang siya tingali ang nakalas karon. (Camille Pateres/IBM)(BANATNEWS)