Gibombahan “front” sa prostitusyon?

CEBU, Philippines — Nasuko nga mga ginikanan sa mga menor de edad nga gikuhang mga entertainers sa bar nga gituohang gipanag-iya sa Sugboanong negosyante nga karon pugante nga si Peter Lim ang gidudahan sa kapolisan nga maoy nagpaluyo sa paglabay og mga improvised explosive devices sa bar ug massage parlor niini sa miaging semana.

Kini sumala pa sa direktor sa Police Regional Office-7 nga si Chief Supt. Debold Sinas.  Butyag niya nga ang maong mga lugar target na usab sa operasyon sa Women and Children Protection Center- Visayas Field Unit ug sa Cebu City Police Office. Kay nakadawat sila og report nga gigamit sa prostitusyon  ang mga menor de edad sa maong mga establisamento.

Si Sinas miingon nga base sa ilang intelligence report, si Lim gyud maoy tag-iya sa Chuva Chuva Massage Parlor ug sa New Infinity KTV and Restobar nga parehong gilabayan og IED, apan ang sa Chuva Chuva lang maoy mibuto.

Ang tigpamaba ni Lim daan nang namahayag nga dili iya sa maong negosyante ang maong mga establisamento.

Matud ni Sinas, maisip nga pagpanghulga ang maong mga IEDs kay tiklong ra ang gigamit.  Gawas sa maong anggulo gisusi usab ang koneksyon sa kasong giatubang ni Lim karon.

Si Lim adunay warrant of arrest bahin sa kasong gipasaka sa Criminal Investigation and Detection Group National tungod sa pasangil nga nalambigit kini sa ilegal nga drugas. (BANAT NEWS)