‘Dry land’ sa Balili unahon pagpalit
CEBU, Philippines — Gusto sa Dakbayan sa Naga nga unahon pagpalit ang “dry land” sa kontrobersyal nga Balili property nga gipanag-iya sa Probinsiya sa Sugbo.
Kini ang sulod sa counter proposal nga gipaabot nga iduso nila ngadto sa Kapitolyo.
Matud ni Mayor Kristine Vanessa Chiong nga desidido ang dakbayan nga mopalit sa Balili property sa kantidad nga P100-million nga pagpabaligya niini sa Kapitolyo.
“Nag due diligence lang sad ta, gi-consider sad nato ang kanang circumstances but for sure we will proceed with the acquiring the Balili whether or not tanan ba or a portion lang,” matud ni Chiong.
Sumala pa niya nga gawas sa proposal nila nga ang “dry land” una ang paliton, mohangyo sab sila sa Kapitolyo nga ipagamit ang tibuok luna pinaagi sa usa ka memorandum of agreement.
Si Gobernador Hilario Davide III nagkanayon nga magpaabot lang sila nga maduso na sa Siyudad sa Naga ang counter proposal niini aron ma-review sa Kapitolyo ug makighinabi sila pagbalik sa mga opisyal sa dakbayan.
Ang 25 ka ektarya nga luna nahimong kontrobersiyal human nasayran nga ang bahin niini anaa sa ilawom sa dagat ug gipalit gihapon sa Kapitolyo ubos sa administrasyon ni kanhi gobernador ug karon Kongresista Gwendolyn Garcia.
Sa pagkakaron ang maong luna gigamit gihapon sa Kapitolyo ubos sa pamunoan ni Davide isip butanganan sa mga nasakmit nga butane canisters sa Department of Energy ug agricultural inputs sa Provincial Agriculture Office ug sa breeding area sa mga kanding sa Provincial Veterinary Office. (BANAT NEWS)
- Latest
