Text message sa mga ‘tukhangonon’ di tinuod
CEBU, Philippines — Nipahimangno ang Philippine National Police Anti-Cybercrime Group nga dili basta-basta motuo sa mga text messages nga nag-ingon nga lakip sila sa tukhangonon ug pabayron aron mapapas sa drug watchlist sa kapolisan.
Niluwat og pahibalo ang ACG nga aduna nay pipila ka nabiktima sa gitawag karon og telecom fraud diin gisakyan sa maong modus ang kampanya sa administrasyong Duterte kontra drugas.
Si acting chief of staff sa ACG ug kanhi direktor sa Cebu City Police Office nga si Senior Supt. Joel Doria niingon nga pangwartahan sa mga suspek ang mokagat sa ilang ipadalang text message bugti sa giingong pagpapas sa ilang pangan sa drug watchlist ni Presidente Rodrigo Duterte.
“Never submit yourself into any scam as this one, remember that Oplan Tokhang is initiated by a PNP member in uniform and present in a person listed in a drug watchlist in his/her known address, accompanied by a barangay official,” matud sa direktor sa ACG nga si Chief Supt. Marni Marcos Jr.
Pahinumdum ni Marcos nga dili tiggamitan og telecommunication ang kapolisan sa pagpahigayon og Oplan Tokhang.
Kon ang nakadawat sa text message walay kalambigitan sa ilegal nga drugas dili kini maalarma sanglit dili kini tinuod.
Dugang niya nga mas maayo kon i-screenshot ang maong text messages inubanan sa numero sa nagpadala ug iduso sa labing duol nga estasyonan sa polis o dili ba kaha sa buhatan sa ACG aron masubay kon kinsa ang mangingilad.
Ang Tokhang o Toktok Hangyo gimugna aron agnihon ang nalambigit sa ilegal nga drugas nga motahan sa gobiyerno aron matabangan sa pagbag-o ug dili ingon pabayron aron mapapas lang sa listahan, si Marcos niingon. (BANAT NEWS)
- Latest
