Dungan ang kalihukan sa BOPK, Team Rama ugma

CEBU, Philippines — Mahitabo sa samang adlaw ang kalihukan sa Bando Osmeña Pundok Kauswagan (BOPK) ug Barug Team Rama-PDP-Laban karong Septiyembre 9, adlaw’ng Domingo.

Usa ka Thanksgiving Mass ang kalihukan sa BOPK ug Solidarity Mass sa Barug Team Rama-PDP-Laban.

Si Konsehal Raymond Alvin Garcia niingon nga magsugod sa alas 4 sa hapon hangtud sa alas 7 sa gabii ang ilang kalihukan isip pagpakita og suporta sa kampanya ni Presidente Rodrigo Duterte batok sa ginadiling drugas ingon man pagpakita sab kini og suporta ngadto sa kapolisan.

Gibana-bana nga moabot sa 10 mil ka tawo ang motambong sa kalihukan diin giimbitar nila ang kapolisan sa siyudad ug probinsiya ingon man sa regional headquarters.

Samtang si Konsehal Margarita Osmeña nibutyag nga ang ilang kalihukan pagpasalamat sa mga positibong panghitao sa Siyudad sa Sugbo.

Kini naglakip sa kasulbaran sa isyu sa 93-1, ang pinirmahay sa siyudad ug Universal Hotels and Resorts, Inc. alang sa P18-billion Kawit Island Project, pagkuha nila sa mayoriya sa konseho ug uban pa.

Si Osmeña niasoy nga tanan puwede motambong sa ilang kalihukan nga ipahigayon sa Plaza Sugbo sa alas 4:30 sa hapon diin dunay hamubong programa dayun Santos nga Misa nga pangulohan ni Cebu Archbishop Jose Palma.

Hapon ang ilang Thanksgiving Mass sanglit duna sab sila’y kalihukan sa buntag subay na sa ika-140 nga birth anniversary ni Don Sergio Osmeña Sr. (/GMR)(BANATNEWS)