CEBU, Philippines — Dili mominus upat ka tawo ang gituohang kuyog sa pagpusil patay kang Ronda Mayor Mariano Blanco III sulod sa munisipyo sigun sa director sa Cebu Provincial Police Office, Senior Supt. Manuel Javier Abrugena.
Kini human sa case conference sa Special Investigation Task Group Blanco base usab sa pamahayag sa duha ka job order nga mga kawani sa munisipyo.
Giingong upat ka tawo ang wala na nisaka sa taas sa munisipyo ug maoy nagpahupo sa duha dayun mga sipang boto sa armas ang nadunggan gikan sa taas.
Nasuta sa imbestigasyon nga M16 rifle ang gigamit sa pagpusil patay sa mayor.
Nadiskubrehan sa SITG nga peke ang plakang 3912 nga gigamit nga van nga gisakyan sa mga mamumuno.
Matud ni Abrugena nga ilang gipangtan-aw nga persons of interest ang mga giingong binuhi sa mayor nga mga hitman sa buhi pa kini.
Wala hinuon gisalikway sa kapolisan ang anggulo sa kalambigitan sa ginadiling drugas ug sa posibleng koneksyon sa pagpatay sa iyang bise mayor ug paryente nga si Atty. Jonnah John Ungab.
Sa laing bahin gihangop ni Abrugena ang desisyon sa pamilya nga magpatabang sa National Bureau of Investigation sa imbestigasyon sa kaso.
Gihimakak sab ni Abrugena nga may kalambigitan ang gobiyerno sa pagkamatay ni Blanco sanglit usa kini sa gihinganlan ni Presidente Rodrigo Duterte nga narco-politician.
Kagahapon hingpit na nga nilingkod ang gipuli sa gipangrelibuhang 11 ka polis lakip na sa ilang hepe nga si Police Inspector Jay-r Palcon aron imbestigaron kon aduna ba silay kakuwangan sa pagresponde sanglit duol ra kaayo ang police station sa munisipyo.
Hugot nga seguridad ang gipatuman karon sa munisipyo, matud ni acting Mayor Rocky Gabatan.
Gipabantayan ang buhatan sa mayor nga dili maablihan aron dili magubot ang imbestigasyon nga gipahigayon hinungdan nga sirado kini hangtud karon.
Mopasar sab og resolusyon ang Sangguniang Bayan sa Ronda sa pag-awhag sa NBI ug kapolisan nga mohimo og hiniusa nga imbestigasyon may labot sa kamatayon ni Blanco.
Nanghinaut si Gabatan nga paspasan ug paladman ang imbestigasyon ug mataral sa korte ang nihimo sa krimen. (Rowena D. Capistrano/GMR)(BANATNEWS)