Drug dens giguba, 32 sikop

CEBU, Philippines — Duha ka dagkong drug dens ang nasakpan ug gidemolis sa mga operatiba sa Philippine Drug Enforcement Agency (PDEA) -7 samtang 24 ka mga gituohang drug personalities ang nasikop sa managlahing operasyon sa siyudad sa Sugbo ug Dumaguete kagahapong adlawa.

Sa Barangay Lahug, ang operatiba sa PDEA-7 mironda sa pinuy-anan sa managsuong Marites Romano ug Susan Romano human adunay mitaho kanila nga ang duha nagpadagan og drug den ug mga call center agents ang ilang sagad nga kustomer sa maong lugar.

Atol sa operasyon wala sa maong drug den si Marites apan ang igsuon niini nga si Susan maoy nadakpan kauban ang lain pang unom ka tawo nga giingong diha sa drug den nga silang Mary Jane Romano, John Lester Sarsona, Edwin  Romano Jr., Edwin Romano Sr.’  Jonye Bayquilla, ug Oliver Romano Jr.

Nasakmit gikan sa mga suspetsado ang dili muminos 10 gramos nga gituohang shabu nga adunay balor P68,000, ug mga drug paraphernalia.

Sa laing bahin, usa usab ka drug den ang gibungkag sa PDEA-7 didto sa Barangay Looc, siyudad sa Dumaguete kagahapon sa buntag.

Nasikop sa operatiba ang nagpadagan niini nga si Wilfreda Semetara nga matud pa sa tigpamaba sa PDEA-7 nga si Leia Albiar ang suspek makapagawas og dili muminos 100 gramos nga shabu matag adlaw. Moabot 16 ka gidudahang drug users ang naabtan sud sa drug den ug nakuhaan og mga gituohang shabu ang nasikop usab sa kapulisan.

Ang mga suspetsado giila nga sila si Arnold Dela Cruz, Delberto Ramirez, Nexan Pacata, Sunny Boy Dela Cerna, Jemar Calente, Jerry Paner, Benny Argones, Patrick Narciso, Eugene Engreso, Samson Fabugaes, Nelson Abrasaldo, Archie Audeje, Daryl Joyohoy, Neil Raboy,  Jerry Catipay, ug Nolfo Patalita. Nakuha gikan ni Semetara ug laing mga suspetsado ang 30 gramos nga shabu nga mubalor ngadto sa P204,000.

“Ang drug dens usa gyud sa atong priority nga ma-dismantle kay dako man gud na. Actually sa classification nato sa drug affected barangays og moingon lang ta nga ang barangay drug den, ma-consider nana siya as seriously affected,” matud pa ni Albiar.

Samtang sa laing operasyon sa kapolisan, walo ka motorista ang gidakop sa police checkpoint diha sa Don Andres  Soriano Avenue, Barangay  Centro,  Dakbayan  sa Mandaue  tungod sa pagdala og shabu.

Si  Police Officer 3   David  Omambac sa Mandaue City Police Office   miila  sa mga nadakpan nga mao sila si Jonjie Lumapas, 41 nga taga Purok  Sili, Barangay Cambaro, Dakbayan sa Mandaue ug Gian Carlo Ornopia, 24 nga nagpuyo  gihapon sa maong dapit nga nasakmitan sa kapolisan og duha ka gagmay nga paketeng shabu.

Nadakpan  usab si Crisanto Samiento, 26,  Dars  Sarmiento, 23,  Rafael Tumulak, Rosevelt  Pobadora,  23  nga pulos taga, Dakbayan sa Lapu-Lapu  nga nasakmitan  usab sa kapolisan og usa ka paketeng shabu ang matag usa kanila.

Apil sa gidakop sila si  Edmar Gaganoa, 25, Max   Gilbert  Añel, 22  anyos, taga Sitio Canildohan sa Barangay Looc sa maong dakbayan nga pulos nakuhaan og tagsa ka paketeng  shabu.

Samtang nasikop sa kapolisan sa Presinto 3 sa Lapu-Lapu City Police Office  diha sa Joanna Homes Subdivision, Barangay Basak sila si Christian Singson Pozon, 23 ug Allan Dimataga Pozon, 50.

Nakuha gikan kanila ang tulo ka gramong gidudahang shabu. (Rowena Capistrano ug Romeo  T. Limpangog/IBM)(BANATNEWS)