CEBU, Philippines — Nahagsa ang riprap sa La Guerta, Brgy. Lahug, Dakbayan sa Sugbo tungod sa nasinating pag-uwan kagahapon.
Ang sukod sa maong riprap moabot sa tres ngadto sa kwatro ka metros ang gilapdon.
Walay naangol sa maong hitabo sanglit nahagsa ang maong riprap ngadto sa sapa.
Ang buhatan sa Cebu City Disaster Risk Reduction Management miingon nga usa sa mga hinungdan sa daling pagsaka sa tubig sa sapa ug kanal mao ang nagtipun-og nga basura nga gilabay sa mga tawo.
Si Nigel Bañacia, ang pangulo sa CCDRRMO, mipahimangno nga kanunayon sa katawhan ang pagbahig sa ilang mga basura ug sa dili pagpataka og labay niini kay mao kini ang usa sa mga hinungdan sa pagbaha sa siyudad. Dugang ni Bañacia nga gumikan sa sunod-sunod nga pag-uwan sa siyudad, alerto ug andam ang ilang buhatan sa pag-deploy og mga tawo kon adunay mga emerhensiya nga i-report sa kabarangayan kon dili na makaya sa ilang local DRRM.
Sa nahitabong mga pag-uwan sukad niadtong miaging adlaw, gitataw sa CCDRRMO nga nalipay ang mga taga bukirang barangay sa Agsungot gani gitawag nila kini og blessing kay sulod sa duha ngadto sa tulo ka semana na nga walay tubig ang maong barangay.
Gumikan usab sa nasinating pag-uwan, na-recharge ang mga aquifer sa naasoy nga barangay kay napundohan kini og daghang tubig hinungdan nga aduna na usab silay tubig nga magamit. (Richel Ann P. Basiga/ USJ-R Masscom Intern) (BANATNEWS)