CEBU, Philippines – Gikatakdang siradohon karong Septiyembre 1 hangtud 21 niining tuiga ang runway sa Mactan-Cebu International Airport (MCIA) alang sa overlay works isip kabahin sa plano sa runway rehabilitation sa Mactan-Cebu International Airport Authority (MCIAA).
Ang GMR Megawide Cebu Airport Corporation (GMCAC) kauban ang kaalyado nga ahensiya sama sa Civil Aviation Authority nihatag og suporta sa MCIAA alang sa maong proyekto nga mahuman kini sa gikatakdang panahon. Sa umaabot nga pagsirado sa runway ang mga operasyon sa airline kunhuran ngadto sa lima ka oras aron mabalanse ang impact sa domestic ug international flights.
Magbaton usab unya og full parallel emergency runway nga mag-operate samtang isirado ang kasamtangang runway alang sa maintenance ug emergencies.
Sa laing bahin, higpit nga gisuportahan sa mga opisyal sa kagamhanan sa Dakbayan sa Lapu-Lapu ang gipadayag ni Presidente Rodrigo Duterte nga pag-usab sa pangalan sa Mactan Cebu International Airport (MCIA) ngadto na sa Lapu-Lapu International Airport isip paghatag og pasidungog sa lumad nga bayani. Si Mayor Paz Radaza nagkanayon nga makiangayon lang nga kahatagan usab og pasidungog si Datu Lapu-Lapu nga nagpakita sa iyang kaisog sa pagsakbang sa mga langyaw nga gipangulohan ni Ferdinand Magellan diin usab naangkon nila ang kadaugan.
Nunot sa pagpakita sa ilang suporta ang konseho sa dakbayan pinaagi ni Konsehal Harry Don Radaza maoy nangamahan sa gipalabang nga resulosyon nga nagpadayag sa ilang suporta sa maong tinguha nga paghimo na sa MCIA ngadto na sa Lapu-Lapu International Airport. (Romeo T. Limpangog/BDB)(BANAT NEWS)