CEBU, Philippines – Naghan-ay na ang kagamhanan sa Siyudad sa Sugbo sa Implementing Rules and Regulations (IRR) alang sa mas istriktong implementasyon sa mga ordinansa.
Kini atol sa tigum nilang Konsehal Dave Tumulak, chairman sa committee on public order and safety sa konseho sa siyudad ug Cebu City Police Office director, Senior Supt. Royina Garma sa niaging adlaw.
Pipila sa mga ordinansa mao ang Anti-Vandalism Ordinance of 2018, Anti-Noise Ordinance, City Ordinance 1786 o ang Curfew Ordinance ug uban pa.
Kinahanglan ang IRR aron ang papel sa mga hingtungdang ahensiya mahibaw-an ug epektibo nga mapatuman ang balaud.
Nasayran nga dili tanang law enforcers ang nasayud sa ordinansa nga usa sa rason nga lugak ang implementasyon.
Gipatawag sab niya sa tigum ang Association of Barangay Councils (ABC) aron mapahibawo ang kabarangayan.
Nanghinaut ang konsehal nga mahuman na nila ang IRR aron iduso sa konseho alang sa pag-aprobar.
Samtang ang chairman sa Police Advisory Council, Konsehal Joel Garganera, niingon nga ang kapolisan napahibawo na nga pwede na ipatuman ang Anti-Vandalism Ordinance nga iyang gipangamahanan.
Si Chief Inspector Jomar Medil, hepe sa Tourist Police, nisuporta sa pagpatuman sa ordinansa sanglit ang paghugaw-hugaw sa mga building structures nisiaw na karon.
Kun mapatuman sa sakto ang maong ordinansa, gilauman nga limpyo tan-awon ang siyudad. (/GMR)(BANAT NEWS)