CEBU, Philippines – Gisuspenso sa Office of the Ombudsman ang mayor ug bise mayor, konsehal ug ingon duha ka empleyado sa lungsod sa Barili.
Si Jerome Gonzales provincial director sa Department of Interior and Local Government (DILG) maoy niimplementar sa suspension order batok nila ni Barili Mayor Marlon Garcia, Vice Mayor Teresito Mariñas ug konsehal Shiela Pason.
Apil usab nga gisuspenso mao si Richel Montemayor disaster risk reduction and management officer sa lungsod ug ingon man si Salome Merelos ang disbursing officer.
Ang maong kaso may kalabotan ni sa paglarga ni Pason apan giingong nahuman na lang ang pag-leave ni Pason, padayon gihapon kini nagdawat og sweldo ug iyang RATA (Revised Rates of Representation and Transportation Allowances).
"Nag-leave ang konsehal unya na-extend iyang leave unya dili na covered sa iyang leave nga ma-release-an og sweldo ug RATA," matud ni Gonzales.
Sa gihimong imbestigasyon napamatud-an sa Ombudsman nga guilty sa kasong simple neglect of duty ug gisilotan sila og unom ka bulan nga pagkasuspenso.
Si Garcia kinsa bise mayor niadtong higayona nagkanayon nga igo ra siya mihimo sa iyang ministerial duty isip bise mayor.
"My ministerial duty is to recommend for the approval of the leave of my councilor when I was the vice mayor then unya ako man na ministerial duty I was suspended because I did my job to recommend," matud ni Garcia.
Nagplano karon si Garcia nga moduso og motion for reconsideration kalabot sa maong kaso sunod semana.
Tungod sa pagkasuspenso ni Garcia ug Mariñas, nahimong acting mayor karon ang ikaduha sa ranggo nga membro sa Sangguniang Bayan sa Barili nga si Jeremias Aguillar ug ang acting mayor mao ang ikatulo sa ranking sa SB nga si konsehal Nelson Gingoyon. Si Gonzales nagkanayon nga walay angay nga ipuli sa membro sa Sangguniang Bayan sa Barili sanglit temporaryo ra man ang pagka-bakante sa posisyon sa mga konsehal.
Matud ni Gonzales kon pila ang nahabilin nga konsehal mao ni ang basehan sa quorum. (/IBM)(BANAT NEWS)