Drayber ni Cadungog gibuhian na

CEBU, Philippines — Temporaryo nga nakagawas gikan sa kustodiya sa National Bureau of Investigation-7 ang drayber ni Tejero Konsehal Jessielou Cadungog nga si William Macaslang human nakapiyansa sa kasong attempted homicide.

Unang nakapiyansa si Macaslang og P120 mil sa kasong homicide niadtong Biyernes ug kagahapon gipadayon ang pagpiyansa og P36 mil sa kasong attempted homicide.

Ang Provincial Prosecutor’s Office ni-downgrade sa kasong murder ug frustrated murder nga gipasaka sa Criminal Investigation and Detection Group batok ni Macaslang samtang giabsuwelto si Cadungog.

Kini may kalabutan sa nahitabong pagpamusil sa T. Padilla Extension, Dakbayan sa Sugbo niadtong Hulyo 30 diin napatay ang polis nga si PO3 Eugene Calumba.

Matud ni Atty. Benjamin Militar, abogado ni Macaslang, nga bisan temporaryong nakagawas ang drayber apan nagpabilin gihapon kining nahadlok sa iyang seguridad.

Kini ang hinungdan nga tinguha nilang mangayo og proteksyon sa NBI-7.

Gikwestiyon sa legal consultant sa CIDG-7 ang dali ra kaayo nga pagsulbad sa piskaliya sa kaso ni Cadungog.

Gihulagway ni Atty. Inocencio dela Cerna nga “Olympic speed” ang pagresolbar sa kaso sanglit kasagaran molanat pa og 90 ka adlaw samtang kang Cadungog duha ra ka semana.

Dismayado sab ang Police Regional Office-7 sa pagbasura sa PPO sa maong kaso hinungdan nga gitun-an nila karon ang pagsumiter og motion for reconsideration.

“Of course medyo dismayado, but we will review the resolution,” padayag sa direktor sa PRO-7, Chief Supt. Debold Sinas.

Ang legal officer sa PRO-7, Police Superintendent ug Atty. Ehdel Pereira, nipadayag nga daku sila og kompiyansa nga molusot ang ilang mosyon sanglit aduna silay gihuptang saksi kinsa maoy positibong motudlo kang Cadungog nga anaa sa lugar atol sa hitabo.

Kahinumduman nga si Macaslang niangkon nga siya maoy nakapusil kang Calumba sa pasangil nga buot kining mobanhig sa sakyanan ni Cadungog.

Ang CIDG nagplano sab nga iduso isip supplemental evidence ang sworn statement sa bata kinsa giingong nakakita sa panghitabo apan naabtan sila sa resolusyon sa kaso.

Ila na lang kining isukip sa isang-at nga motion for reconsideration.

Si Regional State Prosecutor Fernando Gubalane nagkanayon nga walay iregularidad sa pagresolba sa kaso kay kini nahulog og inquest cases.

“Inquest cases must be resolved by the inquest prosecutor within the same day unless mag- waiver ang arrested person for a couple of days to submit counter-affidavit which must not be more than 15 days,” matud ni Gubalane sa text message.

Matud niya nga ang 60-days alang lang sa mga kaso nga gipasaka ubos sa regular preliminary investigation ug petition for review/appeal ngadto sa Department of Justice.

Si Cebu City Mayor Tomas Osmeña nihulagway sa planong pagsang-at og motion for reconsideration nga hulga sa mga piskal.

“Why? They going to threaten the prosecutors also? When they file motion for prosecutor, they threaten the prosecutor’s that we will kill your family because if you don’t consider our motion for reconsideration, is that they will do, that’s what I think they will do,” matud ni Osmeña.

Giklaro sab ni Osmeña nga dili siya ang nagbayad sa piyansa ni Macaslag.

Dili sab siya kahatag og security kang Cadungog ingon man kang Macaslang sanglit sa iyang kaugalingon wala gani siya’y security.

“The Cebuanos are endangered, that’s what I’m trying to say. Since they pick on him and I feel it’s really politically motivated and it’s a clear distortion on the part of the General, that’s why I’m taking a stand, I demand that they produce the permit to carry of Banua. I will put it in writing, if they will not respond I will file a case against them including the General,” dugang ni Osmeña. (BANAT NEWS)