CEBU, Philippines — Gisuspenso karon sa Office of the Ombudsman si Talisay City Councilor Socrates Fernandez kini may kalabutan sa kasong simple neglect of duty.
Ang Provincial Director sa Department of Interior and Local Government (DILG) Jerome Gonzales nagkanayon nga iyang gipatuman ang tulo ka bulan nga suspension batok kang Fernandez niadtong Hulyo 31, 2018.
Ang maong kaso kalabutan kini sa giingong pakigkunsabo ni Fernandez pag-eskapo sa iyang anak nga si Joavan Fernandez gikan sa Talisay City detention cell ug gitugotan si Joavan nga mogamit sa sakyanan sa gobiyerno aron nga makasibat niadtong Mayo 8, 2013.
“Respondent is not liable for any of the administrative offenses charged, but he may held liable for neglect of duty”, tipik sa desisyon sa Ombudsman.
Gikompirma ni Emily Cabrera, pangulo sa Human Resources Management Office nga si Fernandez dili makadawat sa iyang sweldo sugod sa bulan sa Agosto hangtud nga mapupos ang suspension order batok kaniya.
Gisuwayan sa pagbisita sa Banat News ang buhatan ni Fernandez diha sa Talisay City Hall apan wala kini ug iyang mga staff nibutyag nga duha ka semana nga ni-leave ang konsehal. Si Fernandez dili usab ma-contact dihang gisuwayan kini og tawag. (BANAT NEWS)