Sugbo way hulga sa terorismo
CEBU, Philippines – Giangkon sa mga awtoridad nga usa sa mga target sa terorismo ang Sugbo apan wala silay na-monitor nga kalihukan labot niini hinungdan nga walay angayang ikahadlok ang publiko bisan sa travel advisory sa embahada sa United Kingdom.
Kagahapon gituki sa intelligence community pinangulohan sa National Intelligence Coordinating Agency (NICA) ang pahimangno sa UK.
Gani matud sa commander sa Task Force Cebu, Colonel Noel Baluyan, nga anaa pa sa threat level two ang Sugbo apan ang ilang pagpangandam alang na sa threat level three.
“Bakit Cebu? Isa sa factor yung influx ng tourists kay wala may Boracay,” matud sa hepe sa Regional Intelligence Division sa Police Regional Office-7 nga si Senior Supt. Remos Medina.
Kasamtangang gisaka sa heightened alert status ang kapolisan ilabi na sa Badian ug Dalaguete nga dugokonon sa mga turista ug lakip sa gipakatap ang mga tourist police.
Unang nipagawas ang embahada sa UK og travel advisory pipila ka adlaw una nahitabo ang engkwentro sa Bohol tali sa mga teroristang grupo ug sa armadong kusog sa gobiyerno sa niaging tuig ug sukad niadto wala nila kini gibakwi.
Niadtong Martes niluwat na sab og laing travel advisory ang UK diin gipahimangnoan og balik ang mga Briton nga dili luwas adtuon ang Mindanao lakip na ang habagatang bahin sa Sugbo ilabi na ang Badian ug Dalaguete nunot sa terorismo.
Ang travel advisory nakapabalaka kang Bise Gobernador Agnes Magpale kinsa maoy chairman sa committee on tourism sa Provincial Board sa Sugbo.
“Unfair man kaayo nga ilang gi-charge ang terrorism, wala man ta ana, maybe we should correct, maybe our Department of Foreign Affairs. I don’t know how we can do about it, if we could correct kay we, walay terrorism,” matud ni Magpale.
Si Magpale gikan pa sa East Asia Inter-Regional Tourism Forum (EATOF) sa Japan diin nagpirmahay sila og bilateral agreement nga magbukas og daghang flights nga mokonektar padulong sa Sugbo. (Le Phyllis F. Antojado/GMR)(BANAT NEWS)
- Latest
